අතුරුදන්වී සිටි 19 හැවිරිදි තරුණියකගේ මළසිරුරක් කළු ගඟේ ඉලුක්මණ්ඩිය ඉවුරේ පාවෙමින් තිබියදී සොයාගෙන තිබේ.
පසුගිය 2 වනදා සිට මෙම තරුණිය අතුරුදන්වී සිටි බවට ඇයගේ සහෝදරයා විසින් ඉංගිරිය පොලීසියට පැමිණිලි කර තිබුණි.
මෙසේ අබිරහස් ලෙස මියගොස් ඇත්තේ ඉංගිරිය රයිගම්වත්ත ප්‍රදේශයේ පදිංචි 19 හැවිරිදි කාව්‍යා සුභාෂිණි නමැති තරුණියකි.
පසුගිය 02 වනදා ඇය සේවය කළ ඉංගිරිය සුපිරි වෙළෙඳසැලෙන් සේවය නිමකර පස්වරු 5:30 ට පිටවී ගොස් ඇති අතර ඉන් පසු ඇය අතුරුදන්වී තිබුණි.
ඇයගේ අතුරුදන්වීම සම්බන්ධයෙන් ඇය සම්බන්ධතා පැවැත්වූ හල්වතුර ප්‍රදේශයේ විදුහලක 30 හැවිරිදි ගුරුවරයකුගෙන් ද පොලීසිය ප්‍රශ්න කර තිබුණි.
එහිදී ගුරුවරයා විසින් පවසා ඇත්තේ මියගිය තරුණිය 2 වනදා අවස්ථා 2කදී තමන්ට කතා කළ බවත් ඉන්පසු කිසිදු තොරතුරක් නොලැබුණු බවත් ය.
අතුරුදන්වූ තරුණියගේ සිරුර හමුවීමත් සමග සැකකාර ගුරුවරයා ද එදිනම හල්වතුර ප්‍රදේශයේ නිවසක ගෙල වැලලාගෙන මියගොස් සිටියදී සොයාගෙන ඇත.
සිද්ධිය සම්බන්ධයෙන් බුලත්සිංහල පොලීසිය සහ ඉංගිරිය පොලීසිය වැඩිදුර විමර්ශන සිදුකරයි.