ලොරියක් කොල්ල කා පලායමින් සිටි පුද්ගලයෙකු කඩුවෙල නගරය හරහා ගමන්කරමින් සිටියදී, එම ලොරි රථයට වෙඩිතබා එම පුද්ගලයාව අත්අඩංගුවට ගැනීමට පොලීසිය කටයුතු කර තිබේ.
පොලීසිය පැවසුවේ මෙලෙස පැහැරගෙන ඇත්තේ වත්තල ප්‍රදේශයේ සුපිරි වෙළඳසැලකට එලවළු රැගෙන පැමිණි අධිශීතකරන සවිකරන ලද, ආවරණය කරන ලද ලොරි රථයක් බවයි.
එහි රියදුරු තේ පානය සඳහා එම සුපිරි වෙළෙඳසැල අසල පිහිටි රාත්‍රී ආපනශාලාවක් ඉදිරිපිට සිය රථය නතර කර තිබියදී, සැකකරු ලොරිය සොරාගෙන ඇති බව පොලීසිය පැවසීය.
මෙලෙස අත්අඩංගුවට ගෙන ඇත්තේ කැලණිය ප්‍රදේශයේ පදිංචි 25 හැවිරිදි පුද්ගලයෙක්ය.
පොලිස් පණිවුඩ හරහා ලද තොරතුරක් අනුව මාර්ග බාධක යොදා ලොරිය නතර කිරීමට උත්සාහ කළද සැකකරු ලොරිය නොනවත්වා ධාවනය කර තිබේ.
ඒ අනුව පොලීසිය විසින් ලොරියට වෙඩිතබා ඇති අතර එම අවස්ථාවේදී සැකකරු ලොරියෙන් බැස පලායාමට උත්සහ කළ අවස්ථාවේදී අඩංගුවටගෙන ඇත.