බහාලුම් නිෂ්කාශන තදබදය අවසන් කිරීම සඳහා ශ්‍රී ලංකා රේගුව දින 04ක විශේෂ වැඩපිළිවෙළක් ආරම්භ කළ බව රේගු මාධ්‍ය ප්‍රකාශකවරයා පවසයි.
මේ අතර බහාලුම් නිෂ්කාශන අර්බුදය විසඳීම සඳහා කෙටීකාලීන සහ මධ්‍යකාලීන යෝජනා ඇතුළත් යෝජනාවලියක් මෙරට ප්‍රමුඛ පෙළේ වාණිජ මණ්ඩල 29ක් විසින් රජයට ඉදිරිපත් කර තිබේ.
සති කිහිපයක සිට පවතින කොළඹ වරායේ බහාලුම් පර්යන්තවලින් ආනයනික බහාලුම් නිෂ්කාශනය කර නිදහස් කිරීමේ ප්‍රමාදය නිසා ඇතිව තිබෙන බහාලුම් රථ පෝලිම් ඊයේ (31) පස්වරුවේත් දක්නට ලැබුණි.
එවන් පසුබිමක කොළඹ වරායේ උද්ගතව ඇති බහාලුම් නිෂ්කාශන අර්බුදය විසඳීම සඳහා වූ යෝජනාවලියක් ප්‍රමුඛ පෙළේ වාණිජ මණ්ඩල 29ක් ඒකාබද්ධ නිවේදනයක් මගින් රජයට ඉදිරිපත් කර ඇත.
ශ්‍රී ලංකා වාණිජ මණ්ඩලය, ශ්‍රී ලංකාවේ අමෙරිකානු වාණිජ මණ්ඩලය, බහාලුම් ප්‍රවාහන සම්මේලනය, ශ්‍රී ලංකා නෞකා නියෝජිත සම්මේලනය, ඒකාබද්ධ ඇඟලුම් කර්මාන්ත ඇතුළු වාණිජ මණ්ඩල 29ක් විසින් ඉදිරිපත් කරන ලද යෝජනාවලියට කෙටිකාලීන යෝජනා 6ක් සහ මධ්‍යකාලීන යෝජනා 5කින් සමන්විතය.
එහිදී කෙටිකාලීනව ගත යුතු පියවර ඉදිරි සතිදෙක ඇතුළත හා මධ්‍ය කාලීනව ගත යුතු පියවර ඉදිරි සති 3-6 කාලය ඇතුළත ගන්නා ලෙස වාණිජ මණ්ඩල සිය ක්‍රියාකාරී සැලැස්ම තුළ සඳහන් කර තිබේ.
ඒ කෙටි කාලීන විසඳුම් ලෙස ස්කෑනින් සහ පරීක්ෂා ක්‍රියාවලිය පැය 24 පුරා ක්‍රියාත්මක කිරීම, ග්‍රීන් චැනල් හරහා සිදුකරන ආනයන සඳහා ආනයනකරුවන්ගේ දැනට පවතින දත්ත යොදාගැනීම මෙන්ම AEO හෙවත් බලයලත් ආර්ථික මෙහෙයුම් සහ CEO හෙවත් රේගු ආර්ථික මෙහෙයුම් වැනි අඩු අවදානමක් සහිත බහාලුම් විශේෂ පරීක්ෂාවලින් තොරව නිදහස් කිරීම ඊට ඇතුළත් වේ.
එම වාණිජ මණ්ඩල 29 ඉදිරිපත් කර ඇති මධ්‍යකාලීන සැලසුම් වන්නේ, බහාලුම් අංගන ධාරිතාව ඉහළ නැංවීම, මෙහෙයුම් ඩිජිටල්කරණය, පුහුණු මිනිස් බලය ඉහළ නැංවීම සහ අදාළ ආයතනවල වගවීම් ඉහළ නැංවීමය.