වැලිගමදී වෙඩිතබා පුද්ගලයෙකු ඝාතනය කිරීමේ සිද්ධිය සම්බන්ධයෙන් තවත් සැකකරුවෙකු අත්අඩංගුවට ගෙන තිබේ.
වැලිගම පොලිස් වසමේ මහනැවියා මාර්ගයේ ගමන් ගත් පුද්ගලයින් පස් දෙනෙකු ඉලක්ක කර ඉකුත් 04 වනදා T56වර්ගයේ ගිනිඅවියකින් සහ පිස්තෝල වර්ගයේ ගිනිඅවියකින් මෙම වෙඩිතැබීම් සිදුකර තිබුණි.
මාතර කොට්ඨාස අපරාධ විමර්ශන කාර්යංශය විසින් ඊයේ (09) සවස් කාලයේදී මාතර ප්‍රදේශයේදී මෙම අපරාධයට අවශ්‍ය කර සිටි සැකකරු අත්අඩංගුවට ගෙන ඇත.
අත්අඩංගුවට ගත් සැකකරු වයස අවුරුදු 29ක් වන බෙලිඅත්ත ප්‍රදේශයේ පදිංචිකරුවෙකි.
මෙම සැකකරු සම්බන්ධයෙන් වැඩිදුර විමර්ශන සිදුකිරීමේදී, අදාළ වෙඩිතැබීම සිදුකළ සැකකරුවන්ට පලායාම සඳහා යොදාගත් කාර් රථය පැදවූ පුද්ගලයා මෙම සැකකරු බවට අනාවරණය වී ඇත.
සැකකරුගේ ප්‍රකාශ මත අපරාධයට උපයෝගී කරගත් කාර් රථය පොලිස් භාරයට ගෙන තිබේ.
වෙඩිතැබීමට සම්බන්ධ සැකකරුවන්ට ආධාර අනුබල දීම සම්බන්ධයෙන් සැකකරුවෙකු හා සැකකාරියක් මීට පෙරද අත්අඩංගුවට ගෙන තිබුණි.