බුද්ධි නිලධාරියකු බව උසාවියට කී කෝට් සාජන් ගැනත් විමර්ශන
තවත් කතාවක් එළියට
බත්තරමුල්ල, ඉසුරුපාය අධ්‍යාපන අමාත්‍යාංශය ඉදිරිපිට පැවති උද්ඝෝෂණයකදී පොලිස් නිලධාරීන් තිදෙනකු කපා තුවාල සිදුකළ බව කියන සිද්ධිය සම්බන්ධයෙන් අත්අඩංගුවට ගත් වීරකැටිය ප්‍රදේශයේ පාසලක සංවර්ධන නිලධාරියකු ලබන 15 වැනිදා දක්වා රක්ෂිත බන්ධනාගාරගත කරන ලෙස කඩුවෙල මහෙස්ත්‍රාත්වරයා පෙරේදා (07දා) නියෝග කළේය.
පොලිස් නිලධාරීන් තිදෙනා කපා තුවාල කළේ යුද හමුදා බුද්ධි අංශයේ නිලධාරියකු විසින් බවට බරපතළ චෝදනාවක් එල්ල වී තිබිණි. මෙම නිලධාරීන් කපා දැමීම රජයේ අනුදැනුම මත සිදුවූවක් බවට ද චෝදනා එල්ල විය.
එහෙත් නුගේගොඩ කොට්ඨාස භාර ජ්‍යෙෂ්ඨ පොලිස් අධිකාරි මංගල දෙහිදෙණිය මහතාගේ පූර්ණ අධීක්ෂණය යටතේ විමර්ශන කළ තලංගම පොලිසිය මෙම සැකකරු හඳුනා ගැනීමට කටයුතු කළේය.
එහිදී සැකකරු වීරකැටිය ප්‍රදේශයේ පාසලක සංවර්ධන නිලධාරියකු බව හෙළි වූ අතර ඒ අනුව සැකකරු අත්අඩංගුවට ගැනීමට විමර්ශන ආරම්භ කර තිබියදී පෙරේදා (7දා) ඔහු තලංගම පොලිසියට භාරවී තිබේ. එසේ භාරවීමෙන් පසු අත්අඩංගුවට ගත් සැකකරු කඩුවෙල අධිකරණය වෙත ඉදිරිපත් කිරීමට තලංගම පොලිසිය කටයුතු කළේය.
ගුරු පත්වීම් ඉල්ලා පාසල් සංවර්ධන නිලධාරීන් විසින් පිරිසක් අධ්‍යාපන අමාත්‍යාංශය ඉදිරිපිටදී ඉකුත් වසරේ දෙසැම්බර් 02 වැනිදා දැවැන්ත උද්ඝෝෂණයක් ක්‍රියාත්මක කර තිබිණ.
එහිදී පොලිස් නිලධාරීන් තිදෙනකු තියුණු ආයුධවලින් කපා තුවාල කර තිබුණේ එම උද්ඝෝෂණය විසුරුවා හැරීමට කටයුතු කරමින් සිටියදීය.
මෙම විරෝධතාවේදී පොලිස් නිලධාරීන්ට කැපුම් තුවාල සිදුකළ තැනැත්තා යුද හමුදා බුද්ධි අංශ නිලධාරියකු බවට කඩුවෙල අධිකරණයේදී විමර්ශන නිලධාරියකු විසින් කරන ලද සඳහන සත්‍ය නොවන බව පසුව කළ විමර්ශනයේදී තහවුරු වී තිබේ.
අධිකරණයේ එම වැරදි ප්‍රකාශය කළ පොලිස් නිලධාරියා සම්බන්ධයෙන් පොලිසිය විමර්ශනයක් කර තිබිණි.