ගතවූ පැය 24 තුළ දිවයිනේ විවිධ ප්‍රදේශවල සිදුවූ රිය අනතුරු 04කින් තරුණයින් දෙදෙනෙක් ඇතුළු සිව්දෙනෙකු මියගොස් තිබේ.
ඊයේ (30) එම අනතුරු සිදුව තිබුණේ දෙයියන්දර, ගලේවෙල, නාල්ල සහ පේරාදෙණිය යන පොලිස්වසම්වලය.
හක්මණ – මුලටියන මාර්ගයේ පල්ලාවල විදුහල ආසන්නයේදී බස් රථයක් ඉදිරියෙන් පැමිණි යතුරු පැදියක ගැටී අනතුරක් සිදුව ඇත.
අනතුරින් පැදිකරු බස් රථයේ ඉදිරි දකුණු පස රෝදයට යටවී බරපතළ තුවාල ලබා දෙයියන්දර රෝහලට ඇතුළත් කිරීමේදී මියගොස් ඇත.
එලෙස මියගොස් ඇත්තේ, ගොම්බද්දල, මාතර ප්‍රදේශයේ පදිංචිව සිටි 37 හැවිරිදි පුද්ගලයෙකි.
මේ අතර අඹේපුස්ස – ත්‍රිකුණාමලය මාර්ගයේ තලකිරියාගම ප්‍රදේශයේදී යතුරුපැදියක් සිමෙන්ති පැටවූ ලොරි රථයක පසුපස ගැටී සිදුවූ අනතුරකින් 22 හැවිරිදි තරුණයෙක් ජීවිත්කෂයට පත්ව තිබේ.
මේ අතර මීරිගම ගිරිඋල්ල මාර්ගයේ ලෝලුවාගොඩ ප්‍රදේශයේදී යතුරු පැදියක් මාර්ගය අයිනේ ගමන් කරමින් සිටි පදිකයෙකුගේ ගැටී අනතුරක් සිදුව ඇත.
අනතුරින් තුවාල ලැබු පදිකයා සහ යතුරු පැදිකරු මීරිගම රෝහලට ඇතුළත් කර ප්‍රතිකාර ලබමින් සිටියදී පදිකයා මියගොස් තිබේ.
එලෙස මියගොස් ඇත්තේ, ලෝලුවාගොඩ ප්‍රදේශයේ පදිංචිව සිටි 48 හැවිරිදි පුද්ගලයෙකි.
එළුගොඩ – පමුණුව මාර්ගයේ දොඩම්වලපිටිය ප්‍රදේශයේදී වෑන් රථයක් යතුරු පැදියක ගැටී අනතුරක් සිදුව ඇත.
අනතුරින් යතුරු පැදිකරු හා පසුපැදිකාරිය තුවාල ලබා පේරාදෙණිය රෝහලට ඇතුළත් කිරීමෙන් පසු යතුරුපැදිකරු මියගොස් ඇත.
පසුපැදිකාරිය වැඩිදුර ප්‍රතිකාර සඳහා මහනුවර රෝහලට ඇතුළත් කර ඇත.
එලෙස මියගොස් ඇත්තේ, පේරාදෙණිය ප්‍රදේශයේ පදිංචිව සිටි 23 හැවිරිදි තරුණයෙකි.