මේ වසරේ මිලියන දෙක ඉක්මවූ සංචාරකයින් පිරිසක් මෙරටට පැමිණ ඇතත් පොදු පහසුකම් ප්‍රමාණවත් නොවීමෙන් සංචාරකයින් අසීරුතාවට පත්වන ආකාරයේ සිදුවීම් සංචාරක කලාප කිහිපයකින්ම වාර්තා වෙයි.
මෙරටට තුන් වැනි වැඩිම විදේශ විනිමය උපයා දෙන ක්ෂේත්‍රය වන්නේ සංචාරක කර්මාන්තයයි.
2024 වසරේ සංචාරක ඉලක්කය වූ මිලියන දෙක ඉක්මවමින් විදෙස් සංචාරකයින් මේ වන විට දිවයිනට පැමිණ ඇති අතර ඒ අනුව මෙවර සංචාරක ඉපැයීම් අමෙරිකානු ඩොලර් බිලියන තුන ඉක්මවනු ඇතැයි සංචාරක සංවර්ධන අධිකාරිය පුරෝකථනය කරයි.
මේ වන විට මෙරට ප්‍රධාන සංචාරක ආකර්ෂණීය ස්ථාන රැසක්ම විදෙස් සංචාරකයින්ගෙන් පිරී ඇත්තේ රටේ සංචාරක කර්මාන්තයට ද නැවුම් බලාපොරොත්තු එක්කරමිනි.
මෙවන් යහපත් වාතාවරණයක් ගොඩනැගී තිබුණත් සංචාරක පාරාදීසයක් වන ඇල්ලේ තත්ත්වය නම් එතරම් සතුටුදායක නැත.
ඒ පවතින අඩුපාඩු රැසක් හේතුවෙනි.
සංචාරකයින්ගේ වාහන නැවැත්වීමට රථ ගාල් නිසි ලෙස නොමැති වීමෙන් දැඩි මාර්ග තදබදයක් ඇති වී තිබේ.
අවන්හල් ඉදිරිපිට වාහන නැවැත්වීමට මින් පෙර සංචාරකයින්ට අවස්ථාව හිමිවුවත් පොලිසිය එය තහනම් කළ නිසා ගැටලුව තවත් උග්‍ර වී ඇතැයි කර්මාන්තකරුවන් පෙන්වා දෙයි.
එසේම රාත්‍රි කාලයේ ප්‍රමාණවත් ආලෝක පද්ධතියක් නොමැති වීමෙන්ද සංචාරකයින් පීඩාවට පත්ව ඇතැයි වාර්තා වෙයි.
මේ අතර පොළොන්නරුවේ පුරාවිද්‍යා නටඹුන් සහ ජාතික වනෝද්‍යාන නැරඹීමට පැමිණෙන සංචාරකයින්ගෙන් ප්‍රවේශපත් සඳහා අයකරන ගාස්තු ද පසුගිය වසරට සාපේක්ෂව තුන් ගුණයකටත් වඩා ඉහළ නංවා ඇතැයි සංචාරක මඟපෙන්වන්නන් පවසයි.
2025 වසරේ සංචාරකයින් මිලියන 3ක් මෙරටට ගෙන්වාගැනීමේ අභිලාෂය යථාර්ථයක් බවට පත්කර ගැනීමට නම් කඩිනමින් මෙම ගැටලු විසඳීමට බලධාරීන් පියවර ගත යුතු නොවේද?