කැලණි ගඟේ ගංවතුර හේතුවෙන් කඩුවෙල නගර සභා ප්‍රදේශ යටවීම පාලනය කිරීම සඳහා විශේෂ පියවර කිහිපයක් ගෙන තිබේ.
ඒ අනුව ඒ අවට පහත් බිම් ගොඩ කිරීම සහ ඒ ආශ්‍රිත සිදුකෙරෙන වැලි කැණීම් කටයුතු පසුගිය (27) සිට ක්‍රියාත්මක වන පරිදි තහනම් කර තිබේ.
කඩුවෙල ප්‍රාදේශීය සංවර්ධන කමිටු රැස්වීමේදී මේ සම්බන්ධව තීරණය ගත් බව එම කමිටු සභාපති පාර්ලිමේන්තු මන්ත්‍රී අසිත නිරෝෂණ පැවසීය.
ඔහු පැවසුවේ අඹතලේ ජල පවිත්‍රාගාරයට ආසන්නව ඉදිකර ඇති පාලන ජල වේල්ල හේතුවෙන් ගංවතුර තත්ත්වය ඇති වීම සඳහා විශාල බලපෑමක් ඇතිවන බවය.
මේ හේතුවෙන් ලෝක බැංකු ව්‍යාපෘතිය යටතේ මෙම ස්ථීර ජල වේල්ල වෙනුවට ස්වංක්‍රීය ජල වේල්ලක් සකස් කිරීම සඳහා සැලසුම් මේ වන විට සකස් කරමින් පවතින බවද ඔහු පැවසීය.