මෙරට ප්‍රධානතම අපනයන කෘෂි භෝගයක් වන කුරුඳු වගාව මගින් වසරකට ඇමරිකානු ඩොලර් මිලියන 500ක ආදායමක් උපයා ගැනීමට සැලසුම් කර ඇති බව කුරුඳු සංවර්ධන දෙපාර්තමේන්තුව පවසයි.
ලංකාවේ කුරුඳු නිෂ්පාදනය වසරක මෙට්‍රික් ටොන් 25,000ක් පමණ වන අතර, ඉන් මෙට්‍රික් ටොන් 19,000කට ආසන්න ප්‍රමාණයක් අපනයනය කරනු ලබයි.
කුරුඳු සංවර්ධන දෙපාර්තමේන්තුවේ අධ්‍යක්ෂ ජනරාල් ජනක ලින්දර මහතා පවසා සිටියේ, දැනට කුරුඳු අපනයනය තුළින් ලංකාවට වසරකට ඩොලර් මිලියන 250ක පමණ විදේශ විනිමයක් උපයා ගන්නා බවයි.
එම ආදායම දෙගුණයක් කිරීම සඳහා සැලසුම් සකස්කර ඇති හෙතෙම පැවසීය.
ඒ අනුව සාම්ප්‍රධායිකව කුරුඳු වගාකර තිබෙන ගාල්ල, මාතර හම්බන්තොට ප්‍රදේශවලට අමතරව කුරුණෑගල, පුත්තලම හා මහවැලි කලාප වැනි ප්‍රදේශවල කුරුඳු වගාව ව්‍යාප්ත කිරීමට කුරුඳු සංවර්ධන දෙපාර්තමේන්තුව සැලසුම් සකසා ඇත.
මේ අතර ජනක ලින්දර මහතා පවසා සිටියේ, චීනය සමග මේ වනවිට කුරුඳු අපනයනය සම්බන්ධයෙන් අවබෝධතා ගිවිසුමක් අත්සන් කර ඇති බවයි.
එහි ප්‍රතිඵලයක් ලෙස 2025 ජනවාරි මස සිට චීනයට ද කුරුඳු අපනයනය කිරීමට අවස්ථාව හිමිවන බව ඔහු පැවසීය.
මීට අමතරව යුරෝපා සංගමය ඇතුළු රටවලටද කුරුඳු අපනයනය වැඩිකිරීමට කුරුඳු සංවර්ධන දෙපාර්තමේන්තුව බලාපොරොත්තු වේ.
කෙසේ නමුත් මෙරට කුරුඳු කර්මාන්තයෙන් වැඩි වශයෙන් අපනයනය කරන්නේ අමුද්‍රව්‍ය ලෙසින් වන අතර, එය අගය වැඩිකළ නිෂ්පාදන ලෙසින් අපනයනය කිරීමට හැකිනම් විදේශ විනිමය දෙගුණ කරගැනීමට පහසුවෙන්ම හැකියාව ඇත.
මේ හේතුවෙන් සුළු හා මධ්‍ය පරිමාණ කුරුඳු ව්‍යාපාරිකයින්ව අගය වැඩිකළ නිෂ්පාදන සඳහා පෙළඹවීමට ආධාර උපකාර කිරීමට කුරුඳු සංවර්ධන දෙපාර්තමේන්තුව බලාපොරොත්තු වේ.