සහල් හිඟය තවමත් පැවතීම හේතුවෙන් එළැඹෙන ජනවාරි මස 10 වැනිදා දක්වා සහල් ආනයනය කිරීම සඳහා අවසර ලබාදීමට වෙළෙඳ අමාත්‍යවරයා එකඟ වූ බව අත්‍යවශ්‍ය ආහාර ද්‍රව්‍ය ආනයනකරුවන්ගේ සංගමය පවසයි.
ඊයේ (23) පැවති සාකච්ඡාවකින් පසු ආනයනකරුවන් පැවසුවේ, ඊට අදාළ යෝජනාව අමාත්‍යවරයා අද රැස්වන කැබිනට් මණ්ඩලයට ඉදිරිපත් කිරීමට නියමිතව ඇති බවය.
වෙළෙඳපොළේ පවතින සහල් අර්බුදයට විසඳුමක් ලෙස සහල් ආනයනය සඳහා ලබාදී තිබූ කාලය දෙසැම්බර් 20 වැනිදායින් අවසන් වූ අතර මේ දක්වා මෙරටට ගෙන්වා තිබූ සහල් ප්‍රමාණය මෙට්‍රික්ටොන් 67,000කි.
කෙසේවෙතත්, රජයේ පාර්ශ්වයෙන් ආනයනය කෙරෙන මෙට්‍රික්ටොන් 70,000ක සහල් තොගයේ පළමු තොගය වන රාජ්‍ය වාණිජ විවිධ නීතිගත සංස්ථාව ඇණවුම් කළ මෙට්‍රික්ටොන් 5,200ක තොගය කොළඹ වරායට ළඟාවීමට නියමිතව ඇත්තේ අද (24) දිනයේදීය.
එමෙන්ම රජය ඇණවුම් කර ඇති සෙසු තොග ගෙන්වීමේ කටයුතු අවසන් කිරීම ලබන සතිය තුළ සිදුකෙරෙන බවද රාජ්‍ය වාණිජ විවිධ නීතිගත සංස්ථාව මාධය කළ විමසීමේදී සඳහන් කළේය.
පෞද්ගලික අංශය ද තවත් සහල් තොග ආනයනය කිරීමේ අරමුණින් ආනයනකරුවන්ගේ සංගමය ලෙස වෙළෙඳ අමාත්‍යවරයාට පෙරේදා ලිපියක් භාර දී තිබුණි.