අයිස් මත්ද්‍රව්‍ය තොගයක් සමග සැකකරුවන් දෙදෙනෙකු පොලීසිය විසින් අත්අඩංගුවට ගෙන තිබේ.
පොලිස් විශේෂ කාර්ය බළකා විශේෂ මෙහෙයුම් ඒකකයේ නිලධාරීන් කණ්ඩායමක් විසින් ඊයේ (20) දින කඩවත පොලිස් වසමේ ගෝනහේන ප්‍රදේශයේදී හා දොම්පේ පොලිස් වසමේ දෙකටන ප්‍රදේශයේදී සිදුකළ වැටලීමකදී මෙම සැකකරුවන් අත්අඩංගුවට ගෙන තිබේ.
එහිදී සැකකරුවන් සතුව තිබී අයිස් මත්ද්‍රව්‍ය කිලෝ 03 ග්‍රෑම් 536ක් සහ එම ජාවාරමින් උපායා ගන්නා බවට සැක කෙරෙන රුපියල් එක්කෝටි දස ලක්ෂයක මුදලක්, ජංගම දුරකථන 03ක් හා මෝටර් රථයක් ද පොලිස් භාරයට ගෙන තිබේ.
සැකකරුවන් ඩුබායි රාජ්‍යයේ සැඟව සිටින ප්‍රබල මත්ද්‍රව්‍ය ජාවාරම්කරුවෙකුගේ සමීපතමයින් බවට දැනට සිදුකරන ලද විමර්ශන වලදී අනාවරණය වී ඇතැයි ද පොලීසිය පවසයි.
අත්අඩංගුවට ගත් සැකකරුවන් පොලිස් මත්ද්‍රව්‍ය කාර්යාංශය වෙත භාර දී තිබේ.
සිද්ධිය සම්බන්ධව පොලිස් මත්ද්‍රව්‍ය කාර්යාංශය වැඩිදුර විමර්ශන සිදුකරයි.