ගාල්ල දිස්ත්‍රික්කය තුල “සෞභාග්‍යයේ දැක්ම” ප්‍රතිපත්ති ප්‍රකාරව තාක්ෂණික නව්‍යකරණ සංස්කෘතියක් (Cultural Technological Innovation) ගොඩනැගීම අරමුණින් දිවයින පුරා පිහිටුවා ඇති තාක්ෂණ උද්‍යාන පහෙන් පළමුවැනි තාක්ෂණ උද්‍යානය ලෙස අක්මීමණ ප්‍රාදේශීය ලේකම් කාර්යාලයට අයත් ගාල්ල, වලහන්දුව වතුයායේ “අක්කර 29 යි රුඩ් 03 යි, පර්චස් 7.15ක ඉඩම” තාක්ෂණ අමාත්‍යංශය වෙත පවරා එහි ගාල්ල දිස්ත්‍රික් තාක්ෂණ උද්‍යානය ස්ථාපිත කිරීමට 2021 අප්‍රේල් මස 29 වන දින මුල්ගල් තබා ඇති නමුදු මේ වන විටත් එහි කටයුතු නිමා නොකර අඩාල තත්වයේ පසුවන බවට අප වෙත වාර්තා විය.
මෙම ඉඩම පසුකාලීනව පර්යේෂණ හා නව නිපැයුම් අංශය – අධ්‍යාපන, විද්‍යා හා තාක්ෂණ අමාත්‍යාංශය විසින් නාගරික සංවර්ධන හා නිවාස අමාත්‍යාංශය වෙත පවරා ඇති අතර, ඉඩම් කොටස තාක්ෂණ අමාත්‍යාංශය සහ නාගරික සංවර්ධන හා නිවාස අමාත්‍යංශය වෙත නීතියමය වශයෙන් පවරාදීම සිදුකර නොමැති බවත්, 2021 අංක 130 දරන ආඥාව (38 වැනි වගන්තිය (ආ) අතුරු විධානය යටතේ ආඥාව) පදනම් කර ගනිමින් මේවන විටත් ඉඩමේ භුක්තිය අක්මීමණ ප්‍රාදේශීය ලේකම් කාර්යාලය යටතේ පවතින බවටත් අණාවරණය වී ඇත.
අදාල ව්‍යාපෘතියේ ප්‍රධාන කොන්ත්‍රාත්කරු ලෙස MAGA ආයතනය කටයුතු කර ඇති අතර, එම ආයතනයේ විෂය පථයට අනුව නවීන කාර්යාල ඒකක 12 ක්, පරිපාලන ගොඩනැගිල්ලක්, විශාල විනෝදාස්වාදක ප්‍රදේශයක්, සහ බහු ආපනශාලා සහ ආපනශාලා සඳහා පහසුකම්වලින් සමන්විත නවීනතම තොරතුරු තාක්ෂණ පහසුකම්වලින් සමන්විත මීටර් 41,000 සංකීර්ණය ඉදිකිරීමට යෝජිතව තිබී ඇති බවට සඳහන් වේ.
මෙම තාක්ෂණ උද්‍යානයේ ඉදිකිරීම් කටයුතු මීට පෙර පැවති රජය මගින් ආරම්භ කර ඇති නමුත් මෙරට පැවතී ආර්ථික උද්ධමනය හේතුවෙන් එම ඉදිකිරීම් කටයුතු තාවකාලිකව නවතා දැමීම සිදුව ඇති බවත්, පසුව පැවති රජයන් මගින්ද මේ පිළිබඳව අවධානයක් යොමු නොකරමින් කටයුතු කිරීම හරහා මේ වන විට අදාල භූමිය ප්‍රයෝජනයට නොගනිමින් විනාශයට පත්වෙමින් පවති. කෙසේ වෙතත් නිසි බලධාරීන්ගේ අවධානයට මෙය ලක්කරවීම අපගේ බලාපොරොත්තුවයි.
