අනුරාධපුර – කුඹිච්චංකුලම නිදහස් කලාපය අසලදී ඊයේ (30) පස්වරුවේ තරුණයෙක් විසින් තරුණියකට තියුණු ආයුධයකින් පහරදී තිබේ.
ඔවුන් දෙදෙනා පෙම්වතුන් බව පොලීසිය පැවසීය.
බරපතළ කැපුම් තුවාල ලැබූ පෙම්වතිය මේ වනවිට අනුරාධපුර ශික්ෂණ රෝහලේ දැඩිසත්කාර ඒකකයේ ප්‍රතිකාර ලබමින් සිටින අතර ඇයට ශල්‍යකර්මයක් ද සිදුකර ඇති බව වාර්තා වේ.
පොලීසිය පැවසුවේ දෙදෙනා අතර ඇති වූ ආරවුලක් මත පෙම්වතා විසින් සිය පෙම්වතියට මෙලෙස පිහියකින් පහර දී ඇති බවය.
මෙම තරුණිය වෙනත් පුද්ගලයෙකු සමග ප්‍රේම සම්බන්ධතාවයක් ඇති කරගෙන ඇති බවට දැනගැනීමත් සමග සැකකරු විසින් සිය පෙම්වතියට මුණ ගැසීමට අවශ්‍ය බව පවසා තිබේ.
ඒ අතරතුර දී පෙම්වතා සතුව පිහියක් සහ වස බෝතයක් තිබෙන බව තරුණිය දැනගැනීමත් සමග ඇය සිය පෙම්වතාව මඟහැර මීටර් 500ක් පමණ දුරක් දිවගොස් ඇති බව වාර්තා වෙයි.
එහිදී පෙම්වතා තරුණියව ලූහුබැඳ පැමිණ ඔහු සතුව තිබූ පිහියෙන් තරුණියට මෙලෙස පහරදී ඇති බව පොලීසිය පවසයි.
එය දුටු පිරිසක් එක්වී තරුණියව බේරාගෙන ඇති අතර ඔවුන් තරුණයාව මෙල්ලකර පෙලීසියට භාරදී තිබුණි.
ඔවුන් දෙදෙනා වසර 9ක් පමණ කාලයක් පෙම්වතුන් ලෙස සිට ඇති බව සඳහන් ය.
මේ සම්බන්ධයෙන් අනුරාධපුර පොලීසිය වැඩිදුර පරීක්ෂණ සිදුකරයි.