අතපසුකිරීමක් හෝ නොසැලකිලිමත් කමක් ජීවිතයක් අහිමිවීමෙන් වුවද කෙළවර විය හැකිය.
එලෙස නොසැලකිල්ලක් නිසා යුවතියකට ජීවිතයෙන් වන්දි ගෙවීමට සිදුවූ ඛේදජනක පුවතක් බත්තරමුල්ල ප්‍රදේශයෙන් වාර්තා වේ.
30 හැවිරිදි හංසිනී භාග්‍යා දේශීය ආදායම් දෙපාර්තමේන්තුවේ කළමනාකරණ සහකාරවරියක්ය.
රාජකාරිය නිමාකොට හංසිනී පසුගිය 11 වැනිදා පස්වරු 6.40ට පමණ තම නවාතැන වෙත පැමිණ තිබුණේය.
ඇය තවත් හිතවතියක් සමග නවාතැන් ගෙන සිටින්නේ බත්තරමුල්ල ප්‍රධාන වීදිය සම්පත් පෙදෙසේ පිහිටි දෙමහල් නිවසක ඉහළ මාලයේය.
හංසිනී සිය රාත්‍රී ආහාරය සූදානම් කරමින් සිට ඇති අතර, නාන කාමරයේ සිට ඇති මිතුරියට කෑගැසීමක් ඇසී තිබෙන්නේ යමක් ඇදවැටෙන ශබ්දයක් ද සමගින්ය.
වහා නාන කාමරයෙන් ඉවතට පැමිණ බැලූ මිතුරියට සිය ඇස් අදහාගත නොහැකි වී ඇත්තේ නවාතැන පසුපස තිබූ අනාරක්ෂිත ස්ථානයකින් පහළට වැටී සිටි හංසිනී දැකීමත් සමගයි.
ඉහළ මහලෙන් සෘජුවම පහළට නිරාවරණය වන එම අනතුරුදායක ස්ථානයේ කලක සිට කිසිදු බැම්මක් හෝ ආවරණයක් තිබී නොමැත.
වහාම 1990 ගිලන්රථයක් ගෙන්වාගෙන හංසනී කොළඹ ජාතික රෝහලට ඇතුළත් කරන්නට නිවැසියන් කටයුතු කර තිබුණි.
කෙසේ නමුත් රෝහල් දැඩි සත්කාර ඒකකයේ ප්‍රතිකාර ලබමින් සිටි හංසිනී ඊයේ පස්වරුවේ මෙලොව හැරදා ගියාය.
දියණියන් තිදෙනෙකුගෙන් යුත් පවුලේ දෙවැන්නා වන හංසිනී උපාධිධාරිණියක්ය.
ඇගේ අවාසනාවන්ත මරණය සමාජ මාධ්‍ය තුළ පවා දැඩිලෙස කතාබහට ලක්ව තිබේ.
ඇය සිටි නවාතැනේ අනතුරුදායක ස්ථානය පිළිසකර කර තිබුණා නම් මේ වටිනා ජීවිතයට මේ ඉරණම අත් නොවේ.
හංසිනී සිය ජීවිතයෙන් මෙලෙස සමුගන්නේ කුලී නිවෙස් හිමියන්ට පමණක් නොව සමස්ත රටටම පාඩමක් කියාදෙමින්ය.