පානදුර ප්‍රාදේශීය ලේකම් කොට්ඨාශයට අයත් පානදුර නව පොදු වෙළඳ සංකීර්ණය සඳහා ඉදිකිරීම් කටයුතු මේවන විට සිදුවෙමින් පවතින අතර, තත් වෙළඳ සංකීර්ණයේ වෙළඳසැල් බෙදා දීමේ කටයුතු පානදුර නගර සභාව සහ පොදු වෙළඳ සංගමය හරහා සිදුවන බවත් මෙම වෙළඳ සංකීර්ණයේ වෙළඳසැල් ස්ථානගත කිරීමේදී මාළු අලෙවි කරන ලද වෙළඳසැල් නවතමයෙන් ඉදිවන සංකීර්ණයේ පිටුපස පාරිභෝගිකයන් හට නොපෙනෙන ආකාරයෙන් ස්ථානගත කිරීමට සැලසුම් කර ඇති බවටත් වාර්තාවේ.
මේ අතර මාළු වෙළඳසැල් හිමියන් විසින් ඉදිරියේදී ලබා දීමට යෝජනා කර ඇති මාළු වෙළද ස්ථානය කාණු පද්ධතියක් හා මාළු වෙළදාමට සුදුසු පරිසරයක් නොවන බවට ප්‍රකාශ කර සිටී. තවද වෙළඳ සංකීර්ණයට ඔබ්බෙන් මාළු අලෙවිසැල් මහා පරිමාණයෙන් සිදුකිරිම් හේතුවෙන් පාරිභෝගිකයන්ගේ නෙත නොගැටෙන ලෙස මාළු අලෙවිසැල් වෙළඳ සංකීර්ණය තුල ස්ථානගත කිරීම තුල තත් වෙළඳුන්ගේ වෙළඳාම් කටයුතු පහල වැටෙන බවට වැඩිදුරටත් ප්‍රකාශ කර සිටී. එමෙන්ම අමතරව පානදුර නගර සභාව හා පොදු වෙළඳ සංගමයේ ලේකම්වරයාගේ මැදිහත් වීම මත වෙළඳ සංකීර්ණයට ඔබ්බෙන් පිහිටා තිබෙන මාළු අලෙවිසැල් හිමියන්ගේ සැලසුම් මත මෙම ක්‍රියාවලිය සිදුවන බවටත් ඔහුන් චෝදනා කර සිටී.
කෙසේ වෙතත් මාළු වෙළඳුන් හට සිදුව ඇති අසාධාරණය පිළිබඳව වෙළඳ සංගමය හා පානදුර නගර සභාව දැනුවත් කර ඇති නමුත් ඒ සඳහා නිසි විසඳුමක් නොලැබීම මත මාළු වෙළඳසැල් හිමියන් විසින් ඉදිරියේදී විරෝධතාවයක් සිදුකිරීමටත් සැලසුම් කර ඇති අතර එමගින් නිසි විසඳුමක් නොලැබුණහොත් උපවාසයක් ද ආරම්භ කිරීමට සැලසුම්කර ඇති බවට අප වෙත වාර්තා වේ.
රාජ්‍ය ආයතන හා වගකිවයුතු පාර්ශ්‍රව සුළු පිරිසකගේ අවශ්‍යතාවය සඳහා ප්‍රමුඛත්වය දී බහුතරයක් අපහසුතාවන්ට පත් කර පුද්ගලික ලාබ ප්‍රයෝජන ගැනීම තුල රජය පොදු ජනතාව අපහසුතාවන්ට පත් වන අතර නිසි සැලසුමකට අනුව මෙම වෙළ සැල් ස්ථානගත කිරීමට නිසි බලධාරීන් කටයුතු කරනු ඇතැයි අපගේ බලාපොරොත්තුවයි.