අම්බලන්තොට එරමිණියාය ග්‍රාම සේවා වසමේ එරමිණියාය මහා වැවට ඇඹීලිපිටිය චන්ද්‍රිකා වැවේ සිට ජලය රැගෙන විත් එරමිණියාය වැවේ ගබඩා කර එම ස්ථානයේ ඇති ජලය පිරිපහදු ස්ථානය මගින් ජලය පිරිපහදු කර අගුණුකොළපැලැස්ස හා අම්බලන්තොට යන ප්‍රාදේශීය ලේකම් කොට්ඨාශ වල ජිවත්වන පවුල් 20000 පමණ පානීය ජලය ලබා දෙයි.
කෙසේ වෙතත්, එරමිණියාය මහා වැවේ තිබෙන ජලජ ශාක සහ රොන් මඩ පිරී අපවිත්‍රව පවතින බැවින් ඒවා ඉවත් කර වැව පිරිසිදු කර දෙන ලෙසට ඉල්ලා එරමිණියාය ප්‍රදේශවාසීන් විසින් මීට පෙර අවාස්ථා කිහිපයකදි අගුණුකොළපැලැස්ස වාරීමාර්ග දෙපාර්තමේන්තුවේ නිළධාරින් හට ලිපියක් දැනුවත් කර ඇතත් මේ වන තෙක් කිසිදු විසදුමක් ලැබී නොමැති බවට ප්‍රදේශවාසීන් ප්‍රකාශ කර සිටී.
ප්‍රදේශවාසින් පවසන අන්දමට දැනට වසර ගණනකට පෙර සිටම මෙම වැව පිරිසිදු කිරිමක් හෝ ජලජ ශාක ඉවත් කිරිමක් සිදු නොකර ඇති අතර, අදාල වගකිව යුතු බළධාරින් විසින් මේ වන විට එය මග හරිමින් කටයුතු සිදු කරනු ලබන බවට ප්‍රදේශවාසීන් විසින් චෝදනා එල්ල කරනු ලබයි.
කඩිනමින් මෙම වැවේ ජලජ ශාක සහ රොන් මඩ ඉවත් නොකළ හොත් මෙම ප්‍රදේශයේ ජනතාව හට පානීය ජලය අගහිඟ වීමේ වැඩි අවධානමක් පවතින බවත්, මේ සම්බන්ධව වගකිව යුතු බළධාරින් විසින් කඩිනමින් විසදුමක් ලබා නොදුනහොත් ඉදිරියේදී විරෝධතාවයක් සිදු කිරීමට සැළසුමක් ඇති බවටත් ප්‍රදේශවාසීන් අප වාර්තා කරු දැනුවත් කර ඇත.
කෙසේ වෙතත්, අතර අදාල පානීය ජල අවශ්‍යතාව ක්‍රමවත්ව සපුරා දීමට නිසි බළධාරීන්ගේ දෑස් වීවර වනු ඇතැයි අප බලා පොරොත්තු වෙමු.