ගාල්ල දිස්ත්‍රික්කයේ බලපිටිය ප්‍රදේශීය ලේකම් කොට්ඨාශයට අයත් රන්දොඹේ ‘ජීපී ද සිල්වා විදු සෙවන‘ නමැති දෙමහල් ගොඩනැගිල්ල භාවිතයට නොගැනීම හේතුවෙන් ගරා වැටිමේ අවදානමට ලක්ව ඇත. මෙම ස්ථානයේ ජීපී ද සිල්වා ප්‍රාථමික විද්‍යාලය පවත්වාගෙන ගොස් ඇති අතර 2004 වර්ෂයේදි සුනාමි ව්‍යාසනයෙන් පසුව රන්දොඹේ, ඇත්නාවල සුචිත්‍රාරාම විහාරස්ථාන භූමියේ කොටසක අදාල පාසල ප්‍රථිස්ථාපනය කර ඇත.
මේ වන විට මෙම දෙමහල් ගොඩනැගිල්ලෙහි පහත මහලයේ පෙර පාසලක් පවත්වාගෙන යන අතර, ගොඩනැගිල්ලෙහි ඉහළ මහලය හා ඇතැම් කාමර සමාජ විරෝධී ක්‍රියා සඳහා භාවිතා කරන බව ප්‍රදේශවාසීන් අම්බලන්ගොඩ පොලිස් ස්ථානය දැනුවත් කලද මේ දක්වා කිසිදු නීතිමය පියවරක් ගෙන නොමැති බවට ප්‍රදේශවාසීන් විසින් චෝදනා කරනු ලබයි.
කෙසේ වෙතත් නැවත පිරිහරණයට ගත හැකි අයුරින් මෙම රාජ්‍ය දේපල නිසි නඩත්තුවකින් යුතුව පරිහරණයට ගැනීමට නිසි බලධාරීන් ක්‍රියාත්මක වීමේ වැඩි අවශ්‍යතාවයක් පවතින බව අපගේ මතයයි.
