කුඩා පිරිමි දරුවෙකුට වයෝවෘද්ධ කාන්තාවන් දෙදෙනෙක් අමානුෂික ලෙස පහරදෙන අයුරු දැක්වෙන වීඩියෝවක් පසුගියදා සමාජ මාධ්‍ය ඔස්සේ සංසරණය වුණි.
පසුව අනාවරණ වී තිබුණේ අරණායක ඇහැළගස්තැන්න ප්‍රදේශයේ වයස අවුරුදු 6ක පිරිමි දරුවෙකුට මෙලෙස අමානුෂික ලෙස පහර දෙන්නේ දරුවාගේ මිත්තනියගේ සහෝදරියන් දෙදෙනෙකු බවය.
පහරදීම දරුවාගේ මව ද පසෙක සිට අනුමත කරන අයුරු අදාළ වීඩියෝවෙන් දක්නට ලැබුණි.
මෙම අමානුෂික පහරදීම අසල්වැසි කාන්තාවක විසින් සිය ජංගම දුරකථනය මගින් රූගත කර සමාජ මාධ්‍ය වෙත මුදාහැර තිබුණි.
අත්අඩංගුවට ගත් සැකකාරියන් සිව්දෙනා මාවනැල්ල මහෙස්ත්‍රාත් අධිකරණයට ඉදිරිපත් කිරීමෙන් පසුව එළඹෙන 22 වනදා දක්වා රක්ෂිත බන්ධනාගාරගත කෙරුණි.
පහර කෑමට ලක්වූ දරුවා මාවනැල්ල අධිකරණ වෛද්‍යවරයා වෙත ඉදිරිපත් කිරීමට පොලීසිය පියවර ගත්තේය.
දරුවන් මෙලෙස කෘෘරත්වයට පත් නොකර යහමගට ගැනීම සඳහා වැඩිහිටියන්ට වෙනත් විකල්ප ක්‍රම භාවිත කළ නොහැකිද?
ඒ පිළිබඳව පැහැදිලි කළ කොළඹ ප්‍රජා පොලිස් මූලස්ථානයේ ස්ථානාධිපති මනෝජ් සමරසේකර මහතා,
“ශාරීරික වධ හිංසා තුළින් දරුවන් යහමගට ගන්න බැහැ. ප්‍රතිපාදන කැපීම දරුවෙකුට දියහැකි හොඳම දඬුවමයි. ප්‍රිය දෙයක් අහිමිවීමෙන් දරුවා ඒ වරද කරන්නේ නැහැ ආපහු. 18ට අඩු දරුවන්ට ශාරීරිකව, මානසිකව දඬුවම් කළ නොහැකියි. අධිකරණයෙන් වරදකරුවකු වුවහොත් බරපතළ වැඩ සහිතව වසර 10ක් බන්ධනාගාරගත කළ හැකියි.”