ධාතුසේන රජතුමා විසින් කරවන බවට සැලකෙන කලා වැවේ ප්රධාන වානේ ගලක තැන්පත් කොට තිබුණු නිධන් වස්තු කිසියම් පිරිසක් සොරා ගෙන ඇතැයි ඉපලෝගම පොලීසියට පැමිණිල්ලක් ලැබී තිබේ.
යන්ත්ර සූත්ර උපයෝගී කරගනිමින් ගල විද අදාළ නිධන් වස්තු රැගෙන ගොස් ඇතැයි අනාවරණය වී ඇත.
කලා වැවේ ඉපැරණි වාන ආසන්නයේ ම අධි ආරක්ෂිත කලාපයේ මෙම සොරකම සිදුව තිබේ.
මෙම සොරකම මහවැලියේ ඇතැම් නිලධාරීන් විසින් යටපත් කිරීමට උත්සාහ ගන්නා බවට ප්රදේශවාසීන් චෝදනා එල්ල කරති.
බෝවතැන්න ජලාශ භාරා ප්රධාන ඉංජිනේරු බුද්ධික මහේෂ් නවරත්න මහතාගෙන් අප කළ විමසීමේදී කියා සිටියේ, තමන්ට ද ඊයේ (19) උදෑසන මෙම සිදුවීම පිළිබඳව දැන ගැනීමට හැකි වූ බවත්, මේ හේතුවෙන් වැවේ වානට ද දැඩි බලපෑම් එල්ලවන නිසා වහාම නිලධාරීන් යොදවා පොලීසියට පැමිණිලි කරන ලෙස තමන් උපදෙස් දුන් බවත් ඒ මහතා පැවසීය.
කලා වැව මහවැලි අධිකාරියෙන් පාලනය වන ස්ථානයක් වූ නමුත් මෙහි ආරක්ෂිතය කලාපයේ බෝට්ටු සවාරි සඳහා පෞද්ගලික අයෙකුට අවසර ලබාදී ඇති බව ද වාර්තා වේ.
එම අවසරය ලබාගත් පුද්ගලයින් අධි ආරක්ෂිත ප්රදේශවල සංචාරකයන් රැගෙන ගොස් තාවකාලිකව කූඩාරම් තැනීම, එම ස්ථානවල නැවතී රැය පහන් කිරීම ආදී කටයුතුවල නිරත වන බවත් බෝට්ටු සවාරි අනුමත කරගෙන ආරම්භ කරන්නට වූයේ මෙම නිධන් වස්තු සොරා ගැනීමට බව සමස්ත ලංකා ගොවි ජන සම්මේලනයේ ජාතික සංවිධායක නාමල් කරුණාරත්න මහතා චෝදනා එල්ල කරයි.
එමෙන්ම මෙම ස්ථානයට රැය පහන් කිරීම සඳහා අවසර ලබා දුන්නේ කවුරුන්ද? අධි ආරක්ෂිත කලාපයක්ව පවතින වනජීවී බලප්රදේශයක් වන මෙම ස්ථානයට කිසිදු අවසරයකින් තොරව පිටස්තර පුද්ගලයෙකුට පැමිණීමට නොහැකි බවත් බෝට්ටු සේවාවන් පයන මුවාවෙන් මෙම නිධන් ලබා ගැනීමේ ක්රියාවලිය පිළිබඳව රජය පරීක්ෂණයක් පැවැත්විය යුතු බවද ඒ මහතා වැඩිදුරටත් කියා සිටියේය.