උතුරු දුම්රිය මාර්ගයේ සංවර්ධන කටයුතු එළඹෙන පොසොන් පොහොයට පෙර නිම කිරීමට හැකියාවක් නොමැති බව කැබිනට් මාධ්‍ය ප්‍රකාශක ප්‍රවාහන අමාත්‍ය බන්දුල ගුණවර්ධන මහතා පවසයි.
අද (28) පැවැති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියෙකු විසින් යොමුකළ ප්‍රශ්නයකට පිළිතුරු දෙමින් අමාත්‍යවරයා ඒ බව සඳහන් කළේය.
අමාත්‍යවරයා මෙහිදී පවසා සිටියේ, උතුරු දුම්රිය මාර්ගයේ සංවර්ධන කටයුතු අගෝස්තු මාසය වනවිට නිමකළ හැකි බවය.
මේ අතර පොසොන් පොහොය නිමිති කරගෙන විශේෂ බස් රථ සේවාවක් අරම්භ කරන බවද අමාත්‍යවරයා සඳහන් කළේය.
එම බස් රථ සේවා පොසොන් පොහොය යෙදී ඇති දිනට පෙර දිනත්, පොසොන් පොහොය දිනත් ක්‍රියාත්මක කරන බව ඔහු පවසා සිටියේය.
මෙම විශේෂ බස් රථ සේවාව සඳහා ලංකා ගමනා ගමන මණ්ඩලය හා පුද්ගලික අංශය සමඟ විශේෂ වැඩපිළිවෙළක් යොදා ඇති බවත් එම බස් රථ ගමන් කරන කාලසටහන පිළිබඳ ඉදිරියේ දී දැනුම්දෙන බවත් අමාත්‍යවරයා මෙහිදී වැඩිදුරටත් පැවසීය.