සංවිධානාත්මක මත්ද්‍රව්‍ය ජාවාරම්කරුවෙකුවන “පයාගල තෝරා”ගේ ප්‍රධාන ගෝලයකු වන “පයාගල සුට්ටු” පොලීසිය විසින් අත්අඩංගුවට ගෙන තිබේ.
පොලීසිය පවසන්නේ කළුතර අපරාධ කොට්ඨාසය මගින් ඊයේ (20) සවස එම සැකකරු පයාගල, කලමුල්ල ප්‍රදේශයේදී අත්අඩංගුවට ගෙන ඇති බවය.
එහිදී ඔහුගේ යට ඇඳුමේ සඟවා තිබූ අයිස් මත්ද්‍රව්‍ය ග්‍රෑම් 10ක් සහ එම ජාවාරම සඳහා භාවිතා කළ ජංගම දුරකථන දෙකක්ද කළුතර අපරාධ කොට්ඨාසය භාරයට ගෙන තිබේ.
සැකකරු අත්අඩංගුවට ගෙන ප්‍රශ්න කිරීමේදී අනාවරණය වී ඇත්තේ “පයාගල තෝරා” නැමැත්නා කළුතර බන්ධනාගාරයේ සිට එම ජාවාරම සිදුකරගෙන ගොස් ඇති බවටය.
පොලීසිය පැවසුවේ මෙම සැකකරු විසින් මෙම මත්ද්‍රව්‍ය ජාවාරම සිදුකර ඇත්තේ, ජංගම දුරකත ඔස්සේ මුදල් හුවමාරු කිරීමේ ක්‍රමවේදයක් හරහා බවය.
සැකකරු මෙම අයිස් මත්ද්‍රව්‍ය ජාවාරම දොඩංගොඩ, පයාගල, මතුගම, වැලිපැන්න, කළුතර ආදී ප්‍රදේශවල සිදුකරගෙන ගොස් ඇති අතර එම සැකකරු දැනට මාසයකට පමණ පෙර මත්ද්‍රව්‍ය ජාවාරමක් සම්බන්ධයෙන් රක්ෂිත බන්ධනාගාර ගතව ඇප මත නිදහස්ව ඇති පුද්ගලයෙකි.
48 හැවිරිදි වියේ පසුවන පයාගල ඉහළ වඩුගොඩ ප්‍රදේශයේ පදිංචිකරුවෙකු වන එම සැකකරු අද කළුතර මහෙස්ත්‍රාත් අධිකරණයට ඉදිරිපත් කිරීමට නියමිතය.