කේරළ ගංජා සමග පොලීසිය විසින් අත්අඩංගුවට ගත් සුරාබදු නිලධාරීන්ගේ වැඩ තහනම් කිරීමට පියවර ගෙන තිබේ.
මුදල් රාජ්‍ය අමාත්‍ය රංජිත් සියඹලාපිටිය නිවේදනයක් නිකුත් කරමින් මේ බව සඳහන් කර ඇත.
එම නිවේදනයන් මුදල් රාජ්‍ය අමාත්‍යවරයා වැඩිදුරටත් සඳහන් කර ඇත්තේ මේ සම්බන්ධයෙන් විශේෂ පරීක්ෂණයක් සිදුකිරීම සඳහා අදාළ බලධාරීන්ට නියෝග කළ බවය.
එසේම පරීක්ෂණවලින් අනතුරුව මෙම ක්‍රියාවට සම්බන්ධ සියලු නිලධාරීන්ට එරෙහිව තරාතිරම නොබලා නීතිය අකුරටම ක්‍රියාත්මක කිරීමට පියවර ගන්නා බවද මුදල් රාජ්‍ය අමාත්‍යවරයා සඳහන් කර තිබේ.
කේරළ ගංජා තොගයක් සමග සුරාබදු නිලධාරීන් සිව්දෙනෙකු ඇතුළු සැකකරුවන් 08 දෙනෙකු අත්අඩංගුවට ගනු ලැබුවේ පොලිස් මත්ද්‍රව්‍ය නාශක කාර්යාංශය විසින් මීගමුව සහ හලාවත ප්‍රදේශ ආශ්‍රිතව සිදුකළ වැටලීමකදීය.
මෙහිදී සොයාගෙන ඇති කේරළ ගංජා ප්‍රමාණය කිලෝ 45කට ආසන්න බව පොලීසිය පැවසීය.