හිටපු පොලිස් කොස්තාපල්වරයෙකු අයිස් මත්ද්‍රව්‍ය සමග ඊයේ (26) අත්අඩංගුවට ගත් බව කළුතර කොට්ඨාස විෂ මත්ද්‍රව්‍ය වැටලීම් ඒකකය පවසයි.
මෙලෙස අත්අඩංගුවට ගෙන ඇත්තේ කළුතර බොලොස්සගම ප්‍රදේශයේ පදිංචි 35 හැවිරිදි පුද්ගලයෙකි.
ඔහු අවසන් වරට අරලියගහ මන්දිරයේ රාජකාරී කරමින් සිට දුෂ්චරිත වාර්තා හේතුවෙන් පොලිස් සේවයෙන් ඉවත් කළ අයකු බව උසස් පොලිස් නිලධාරියෙක් පැවසීය.
සැකකරු අයිස් මත්ද්‍රව්‍ය රැගෙන කුඩා ලොරි රථයකින් යමින් සිටින බවට ලද තොරතුරක් මත උප පොලිස් පරීක්ෂක පී.ආර්. වීරසේන ඇතුළු පොලිස් කණ්ඩායමක් වැටලීම සිදුකර තිබුණි.
කළුතර අල්විස් වත්ත ප්‍රදේශයේදී ලොරි රථය නවතා පරීක්ෂා කිරීමේදී කලිසම් සාක්කුවේ සඟවාගෙන සිටි අයිස් මත්ද්‍රව්‍ය ග්‍රෑම් 08කට ආසන්න ප්‍රමාණයක් සහ රුපියල් පනස්දහසක පමණ මුදල් සමග සැකකරුව අත්අඩංගුවට ගෙන තිබේ.