යුද හමුදාව විසින් යුද සමයේදී අධි ආරක්ෂිත කලාප පවත්වාගෙන ගිය කිලිනොච්චිය හා යාපනය යන දිස්ත්‍රික්කවල ඉඩම් අක්කර 109ක් නිදහස් කොට ජනතා අයිතියට පත්කිරීම (10දා) පසුගියදා යාපනය දිස්ත්‍රික් ලේකම් කාර්යාලයේදී සිදුවිණි.
ජනාධිපති කාර්යාලයේ ජාතික ආරක්ෂාව පිළිබඳ ජනාධිපති ජේ‍යෂ්ඨ උපදේශක සහ ජනාධිපති කාර්ය සාධක බළකායේ ප්‍රධානී සාගල රත්නායක මහතා ප්‍රධාන ආරාධිත අමුත්තා ලෙස සහභාගි වෙමින් ඉඩම් හිමිකරුවන් වෙත ඉඩම් ඔප්පු ප්‍රදානය කළේය.
මේ අවස්ථාවට ධීවර අමාත්‍ය ඩග්ලස් දේවානන්දා, යාපනය වැඩ බලන දිසාපති එම්. ප්‍රදීපන්, යාපනය ආරක්ෂක ආඥාපති මේජර් ජෙනරාල් චන්දන වික්‍රමරත්න, ජනාධිපති ලේකම් කාර්යාලයේ උතුරු සම්බන්ධීකාරක එල්. ඉලංගෝවන් යන මහත්වරු ඇතුළු විශාල පිරිසක්ද යාපනයේ හා කිලිනොච්චියේ ඉඩම්ලාභීහුද සහභාගී වූහ.