පුත්තලම සාලියවැව සිරිසරවත්ත ප්‍රදේශයේ 15 හැවිරිදි දැරියක් නිවසේ නොමැති බවට පොලිස් හදිසි ඇමතුම් අංකයට මීට දින කිහිපයකට පෙර ඇමතුමක් ලැබී තිබුණි.
ඊට අනුව විමර්ශන ඇරඹූ සාලියවැව පොලීසියට ඇය හමුවන්නේ, කැලෑබද ප්‍රදේශයක සිටියදීය.
ඒ එම ප්‍රදේශයේම පදිංචි තවත් තරුණයෙකු සමගිනි.
15 හැවිරිදි දැරියගෙන් කළ ප්‍රශ්න කිරීම්වලදී ඇය පොලීසියට පවසා ඇත්තේ, තම මව්පියන්ගේ ද කැමැත්ත ඇතිව තරුණයා සමග ප්‍රේම සබඳතාවක් පැවැත්වූ බවය.
එමෙන්ම අවස්ථා රැසකදී තමා 28 හැවිරිදි තරුණයාගෙන් ලිංගික අපයෝජනයට ලක්වූ බවත් ඇය පොලීසියට පවසා තිබුණි.
එමෙන්ම 2021 සිට අවස්ථා ගණනාවකදී එම ප්‍රදේශයේම පදිංචි තවත් පුද්ගලයින් තිදෙනෙකු ඇයව අපයෝජනයට ලක්කර ඇති බවත් මෙහිදී අනාවරණවී ඇත.
ඇය පොලීසියට පවසා ඇත්තේ, එම සිව්දෙනා අතර තම වැඩිමහල් සහෝදරියගේ සැමියා ද වන බවය.
දැරියක් අපයෝජනයට ලක්කිරීමේ චෝදනාව මත සිද්ධියට සම්බන්ධ පුද්ගලයින් සිව්දෙනා අතරින් තිදෙනෙකු පොලීසිය අත්අඩංගුවට ගෙන තිබේ.
මෙම 15 හැවිරිදි දියණියගේ සිද්ධිය පොලීසිය හමුවේ අනාවරණ වෙද්දී ඇයගේ 12 හැවිරිදි නැගණිය ද වසර ගණනාවක් සඟවා ගෙන සිටි තවත් රහසක් පොලීසියට අනාවරණ කළාය.
ඒ, තමාව ද වයස අවුරුදු 09යේදී නිවසට ආ පුද්ගලයෙකු වරින් වර අපයෝජනයට ලක්කළ බවය.
ඒ අනුව ඔහුව ද පොලීසිය අත්අඩංගුවට ගෙන තිබේ.
පොලීසිය පැවසුවේ අත්අඩංගුවට ගත් සැකකරුවන් සිව්දෙනා අවුරුදු 24 ත් 30ත් අතර වයස්වල පසුවන එම ප්‍රදේශයේම පදිංචි, නිතර දැරිවියන්ගේ නිවසට ආ ගිය පුද්ගලයන් බවය.
සැකකරුවන් ඊයේ පුත්තලම මහෙස්ත්‍රාත් අධිකරණයට ඉදිරිපත් කිරීමෙන් පසු අප්‍රේල් 02 දක්වා දක්වා රක්ෂිත බන්ධනාගාරගත කෙරුණි.
අධිකරණ වෛද්‍ය පරීක්ෂණය සඳහා දැරියන් දෙදෙනාව පුත්තලම මූලික රෝහල වෙත ඇතුළත් කර තිබේ.