බාලවයස්කාර දරුවෙකුට කඩුවකින් පහරදුන් සිද්ධියක් සම්බන්ධයෙන් අත්අඩංගුවට ගත් සැකකරුවෙකු එළඹෙන 19 වනදා දක්වා රිමාන්ඩ් බන්ධනාගාරගතකර තිබේ.
සැකකරු දින 11ක් තිස්සේ සැඟව සිට ඇති අතර සිද්ධියෙන් තුවාල ලැබූ 14 හැවිරිදි වියේ පසුවන දරුවා රෝහලෙන් මුදාහැරීමෙන් අනතුරුව සැකකරු පොලීසිය වෙත පැමිණ භාරවී තිබේ.
එහිදී සැකකරු අත්අඩංගුවට ගත් පොලීසිය අද ඔහුව වැලිසර මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව මහෙස්ත්‍රාත් තුසිත ධම්මික උඩුවවිදානන මහතා මෙම නියෝගය ලබාදී ඇත.
එහිදී පොලීසිය අධිකරණය හමුවේ වැඩිදුරටත් කරුණු දක්වමින් සඳහන් කර ඇත්තේ සැකකරු විසින් කුඩා දරුවාට පහරදීමට යොදාගත් කඩුව සොයා තවදුරටත් විමර්ශන සිදුකරන බවය.
මෙලෙස රිමාන්ඩ් බන්ධනාගාරගතකර ඇත්තේ රාගම පොඩිවීකුඹුර ප්‍රදේශයේ පදිංචිව සිටි තිදරු පියෙකි.
පසුගිය ජනවාරි මස 04 වනදා දෙපාර්ශ්වයක් අතර ඇතිවූ ආරවුලක් දුරදිග යාම හේතුවෙන් සැකකරු විසින් අදාළ දරුවාට කඩුවකින් පහරදී ඇති බවට විමර්ශනවලදී අනාවරණය වී තිබේ.
එම ප්‍රහාරයෙන් දරුවාගේ වම් අතේ ඇඟිල්ලක් සිරුරෙන් වෙන්වී ගොස් ඇති බවට වාර්තාවෙයි.
ප්‍රහාරයෙන් බරපතළ තුවාල ලැබූ අදාළ දරුවා කොළඹ ජාතික රෝහලට ඇතුළත් කර සැත්කමකට භාජනය කර තිබේ.
සිද්ධිය සම්බන්ධයෙන් රාගම පොලීසිය වැඩිදුර විමර්ශන සිදුකරයි.