වෛද්‍යවරුන් සඳහා වන ‘ප්‍රවාහන සහ නිර්බාධක දීමනාව’ හෙවත් ඩැට් දීමනාව රුපියල් 35,000කින් ඉහළ නැංවීමට රජය ඊයේ ගත් තීරණයට විරෝධය පළ කරමින් පරිපූරක වෛද්‍ය වෘත්තීයවේදීන් ඊයේ (09) රජයේ රෝහල්වල සංකේත වැඩවර්ජනයක් දියත් කළේය.
මේ හේතුවෙන් රෝගීන් දැඩි අපහසුතාවට පත්විය.
ඒ අතර මෙම වර්ජනයට සහාය පළ කරමින් අද (10) දින පැය 48ක වර්ජනයක් සිදුකරන බව තවත් සෞඛ්‍ය වෘත්තිය සමිති ගණනාවක් ඊ පස්වරුවේ නිවේදනය කර තිබුණි.
රජය මෙතෙක් කල් වෛද්‍යවරුන් සඳහා මාසිකව ගෙවනු ලැබූ ‘ප්‍රවාහන සහ නිර්බාධක දීමනාව’ හෙවත් DAT දීමනාව රුපියල් 35,000කි. එය රුපියල් 70,000 දක්වා වැඩිකිරීමට ජනාධිපතිවරයාගේ ප්‍රධානත්වයෙන් රැස් වූ කැබිනට් මණ්ඩලයේ අනුමැතිය පළ කෙරුණි.
කෙසේ වෙතත් එම දීමනාව තමන්ට ලබානොදීම සම්බන්ධයෙන් විරෝධය පළ කරමින් පරිපූරක වෛද්‍ය සේවා ඒකාබද්ධ බලමණ්ඩලය ඊයේ උදෑසන 8 සිට රජයේ රෝහල්වල සංකේත වැඩවර්ජනයක් දියත් කර තිබුණි.
නමුත් ළමා රෝහලේ , පිළිකා රෝහලේ , මාතෘ රෝහල්වල, වකුගඩු රෝහල්වල, මධ්‍යම ලේ බැංකුවේ සහ මානසික සෞඛ්‍ය විද්‍යායතනයේ මෙම වර්ජනය ක්‍රියාත්මක නොවීය.
ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය, විද්‍යුත් නිකර්පණ රේඛන ශිල්පී සංගමය, ශ්‍රී ලංකා අක්ෂි තාක්ෂණවේදීන්ගේ සංගමය, සෞඛ්‍ය කීට විද්‍යා නිලධාරීන්ගේ සංගමය, ඛන්තු රේඛන ශිල්පී සංගමය, පාසල් දන්ත චිකිත්සක සංගමය, මහජන සෞඛ්‍ය රසායනාගාර ශිල්පී සංගමය සහ ඖෂධ සංයෝජක නිලධාරීන්ගේ සංගමය එලෙස වර්ජනයට එක්වී තිබේ.