නත්තල සහ අලුත් අවුරුදු සමයේ ඉහළ ගිය එළවළු සහ මත්ස්‍ය මිල ගණන් තවදුරටත් ශීඝ්‍රයෙන් ඉහළ යමින් පවතින බව වාර්තා වේ.
වෙළෙඳුන් පවසන්නේ, කැරට් කිලෝවක් රුපියල් දහසක් පමණ වන අතර, අමු මිරිස් සහ ඉඟුරු කිලෝව රුපියල් දෙදහසේ සීමාවට ළං ව ඇති බවයි.
එමෙන්ම මාළු වෙළෙපොළේ තොග මිල ගණන් ද පාරිභෝගිකයාට දරාගත නොහැකි ලෙස ඉහළ ගොස් ඇත.
පෑලියගොඩ මැනිං වෙළෙඳ සංකීර්ණයේ එළවළු තොග මිල ද අද (04) උදෑසන ඉහළ මට්ටමක පැවති බව වාර්තා වේ.
ඒ අනුව මිල දැක්වුණේ කැරට් කිලෝවක් රුපියල් 750ක්, බෝංචි රුපියල් 500ක්, ලීක්ස් රුපියල් 250ක්, මාලුමිරිස් රුපියල් 700ක් සහ ගෝවා රුපියල් 450ක් ලෙසයි.
නාරාහේන්පිට ආර්ථික මධ්‍යස්ථානයේ කැරට්, මාළුමිරිස්, වම්බටු, බෝංචි, තක්කාලි, අමුමිරිස් ආදී එළවළු කිලෝග්‍රෑමයක් රුපියල් 900 ඉක්මවා අද අලෙවි වී ඇත.
එලෙස විශාල මිලකට අලෙවි වූ එළවළුවල මිල ගණන් ඇතැම් වෙළෙඳුන් අද ප්‍රදර්ශනය කර තිබුණේ ද නැති බව සඳහන් වේ.
නුගේගොඩ සතිපොළේ මාළුමිරිස් කිලොවක් රුපියල් 1,000කටත් අමුමිරිස් කිලෝවක් රුපියල් 1,600කටත් කැරට්, බෝංචි සහ තක්කාලි රුපියල් 800කටත් අලෙවි වූ බව වාර්තා වේ.
මේ අතර, කොළඹට එළවළු රැගෙන එන දඹුල්ල, තඹුත්තේගම හා කැප්පෙටිපොළ ආර්ථික මධ්‍යස්ථානවල ද එළවළු මිල පැවතියේ ඉතා ඉහළ අගයක බව සඳහන්ය.
ඊට හේතුව, වර්ෂාව නිසා අස්වනු විනාශ වීම බව ගොවීහු පවසති.
නමුත්, ගොවීන් පැවසුවේ, තමන් අඩුමිලට එළවළු රැගෙන ආව ද ආර්ථික මධ්‍යස්ථානවල දී නිසි මිලක් නොලැබෙන බවයි.
මේ අතර, සුපිරි වෙළෙඳසල්වල ද අද එළවළු ඉහළ මිලක පැවති බව වාර්තා වේ.
කැරට් කිලෝවක් රුපියල් 1,000ක්, ඉඟුරු රුපියල් 1,900ක්, අමුමිරිස් රුපියල් 1,800ක්, මාළුමිරිස් රුපියල් 900ක්, තක්කාලි රුපියල් 900ක්, වම්බටු රුපියල් 800ක්, ලීක්ස් රුපියල් 560ක් ලෙස සටහන් වී ඇත.
කෙසේ වෙතත් ගොවීන් පවසන්නේ, වෙළෙඳපොළේ එළවළු මිල ඉහළ යාමේ වාසිය තමන්ට නොලැබෙන බවයි.
එළවළු මිල පමණක් නොව මාළු මිල ගණන් ද ඉහළ ගොස් තිබෙන බව වෙළෙඳපොළෙන් වාර්තා වේ.
පෑලියගොඩ මත්ස්‍ය වෙළෙඳ සංකීර්ණයේ අද මත්ස්‍ය මිල දැක්වුණේ, කෙලවල්ලා කිලෝග්‍රෑමයක් රුපියල් 2,000ක්, බලයා රුපියල් 1,000ක්, තෝරා රුපියල් 1,800ක් සහ පරව් කිලෝවක් රුපියල් 1,500ක් සහ ලින්නා රුපියල් 800ක් ලෙසයි.
එමෙන්ම බේරුවල වරායේ ද මත්ස්‍ය මිල ඉහළ අගයක පැවති බව සඳහන්ය.