කොළඹ 07 කුරුඳුවත්තේ නිවසක මියගොස් සිටියදී හමුවූ පියානෝ ගුරුවරියගේ මරණය ඝාතනයක් බව හෙළිවී තිබේ.
ඒ, සම්බන්ධයෙන් අත්අඩංගුවට ගත් සැකකරු 52 හැවිරිදි අවිවාහකයෙක් වන අතර ඔහු අවස්ථා කිහිපයකදීම ගුරුවරියගේ නිවසේ කුලී වැඩ සඳහා පැමිණි අයෙකි.
විමර්ශනයේදී හෙළිවී ඇත්තේ සැකකරු විසින් ගුරුවරියව දූෂණය කර ඇති බවය.
කොළඹ 07 කුරුඳුවත්ත, විජේරාම මාවතේ දෙමහල් නිවසක විසූ 75 හැවිරිදි මිත්රානි ස්මිත් ප්රනාන්දු නමැති පියානෝ වාදන ගුරුවරියක් සැකකටයුතු ලෙස මියගොස් ඇතැයි කුරුඳුවත්ත පොලීසියට පසුගිය දෙසැම්බර් 15 වැනිදා වාර්තා වී තිබුණි.
සිද්ධියේ විමර්ශන ආරම්භ කෙරුණේ කොළඹ දකුණ කොට්ඨාස අපරාධ විමර්ශන කාර්යාංශය විසිනි.
නිවස පිහිටි ස්ථානයේ තිබූ CCTV කැමරා කිහිපයක දර්ශන පරීක්ෂා කළ විමර්ශකයන් දැක තිබුණේ මරණය සිදුවූ දින උදෑසන 8.20ට පමණ එම ගුරුවරියගේ නිවසට කිසියම් පුද්ගලයෙකු පැමිණෙන ආකාරයයි.
ඔහු එදින උදෑසන 10.31ට යළි නිවසෙන් පිටතට පැමිණෙන ආකාරයත් එහිදී සුදු පැහැති ජීප් රථයක් එම නිවසට පැමිණීමත් සමග සැකකරු දිවයන අයුරුත් CCTV දර්ශනවල සටහන්වී තිබුණි.
මුඛ ආවරණ නොමැතිව නිවසට පැමිණි සැකකරු නිවසෙන් පිටතට යන්නේ මුඛ ආවරණද පැළඳ දැඩි කලබලයකිනි.
ඒ අනුව සැකකරු සොයා පරීක්ෂණ ක්රියාත්මක වූ අතර දෙමටගොඩ සියපත් සෙවණ නිවාස සංකීර්ණයේ සිටියදී සැකකරු ඊයේ පොලීසිය විසින් අත්අඩංගුවට ගනු ලැබීය.
කුලී වැඩ කරන්නෙක් වූ ඔහු අවස්ථා කිහිපයකදීම මෙම ගුරුවරියගේ නිවසට පැමිණ ඇති බවත් ඇය මියගිය දිනයේත් මොහු කුලී වැඩ සඳහා එහි පැමිණ තිබූ බවත් හෙළිවී ඇත.
වැඩිදුර ප්රශ්න කිරීම් හමුවේ සැකකරු සිදුවීම පාපොච්චාරණය කළ බව විමර්ශකයන් පවසයි.
වත්තේ වැඩ කරමින් සිටි ඔහුට තේ බීම සඳහා නිවස තුළට පැමිණෙන ලෙස ගුරුවරිය කතාකොට තිබුණි.
ඇය පිළිබඳ ආශාවකින් සිට ඇති සැකකරු නිවසේ පිටත වනා තිබූ රෙද්දක් ගෙන ගුරුවරියගේ හිස වසා වැළඳගෙන ඇත්තේ ඇය දූෂණය කිරීමේ අරමුණිනි.
ගුරුවරිය කෑගසන්නට පටන්ගැනීමත් සමග සැකකරු අසල තිබූ පොලිෂ් යන්ත්රයක වයරයකින් ගෙල තද කරමින් ඇය දූෂණය කර ඇති බව විමර්ශකයන් පවසයි.
කාන්තාව මියගිය පසු නිවසෙන් පැනයන සැකකරු යළිත් එදිනම පස්වරු 3.20 ට පමණ එම නිවසට පැමිණ තිබුණි.
නිවසේ ගෑස් සිලින්ඩර් 2 ක්, ලැප්ටොප් යන්ත්රයක්, ජංගම දුරකථනයක් සොරාගෙන ත්රීරෝද රථයක පටවා රැගෙන ගිය ඔහු ඒවා අලෙවි කර ඇති බව හෙළිවී ඇත.
සැකකරු සුබ්රමනියම් සෙල්වකුමාර් නම් 52 හැවිරිදි අවිවාහක අයෙකි.
කොළඹ දකුණ කොට්ඨාස අපරාධ විමර්ශන කාර්යාංශයේ ස්ථානාධිපති පොලිස් පරීක්ෂක අජිත් කුමාර මහතාගේ මෙහෙයවීමෙන් වැඩිදුර විමර්ශන ක්රියාත්මක අතර සැකකරු අධිකරණයට ඉදිරිපත් කිරීමට නියමිතය.