ඉන්දියාවට පළා ගොස් සිටින ප්‍රධාන පෙළේ සංවිධානාත්මක අපරාධකරුවකු සහ මත්ද්‍රව්‍ය ජාවාරම්කරුවකු වන ‘දිනමුල්ල කංකානම්ගේ නලින් චතුරංග’ නොහොත් ‘ලඩියා’ නැමැත්තාට අයත් රුපියල් දෙකෝටි පනස් ලක්ෂයකට ආසන්න වටිනා සුඛෝභෝගී බස් රථ දෙකක් සිය භාරයට ගත් බව නීති විරෝධී වත්කම් විමර්ශන කොට්ඨාසය සඳහන් කරයි.
වැඩබලන පොලිස්පති දේශබන්දු තෙන්නකෝන් මහතාගේ යුක්තිය මෙහෙයුමට සමගාමී ව සිදු කළ විමර්ශනවල ප්‍රතිඵලයක් ලෙස අදාළ බස් රථ දෙකට තහනම් නියෝගය ලබා ගත් බව පොලීසිය පවසයි.
මොහු, සමයන් නැමැති පාතාල නායකයා ඝාතනය කිරීම සඳහා කළුතර එතනමඬල ප්‍රදේශයේ දී බන්ධනාගාර බස් රථයට ප්‍රහාර එල්ල කිරීමේ ප්‍රධාන සැකකරුවෙකි.
ඔහුගේ මත්ද්‍රව්‍ය ජාවාරම මෙහෙයවන හෝමාගම සහ අතුරුගිරිය ප්‍රදේශයේ ඔහුගේ මිතුරන් දෙදෙනකුගේ නමින් 2019 වසරේ දී ආසන 29 බැගින් වූ මෙම බස් රථ දෙක මිල දී ගෙන විදේශිකයන් ප්‍රවාහනය කරන සංචාරක සේවා සඳහා යොදවා තිබූ බව පොලිස් විමර්ශනවල දී අනාවරණය වී ඇත.
සැකකරුට අයත් තවත් සුඛෝභෝගී බස් රථයක් අතුරුගිරිය පොලීසිය මගින් භාරයට ගෙන ඇති අතර, ඒ සම්බන්ධයෙන්ද විමර්ශන පවත්වන බව නීති විරෝධී වත්කම් විමර්ශන කොට්ඨාසය කියයි.