කාන්තා නේවාසිකාගාරයක දැරියන්ට අතවර කිරීමේ සිද්ධියක් සම්බන්ධයෙන් අත්අඩංගුවට ගත් ක්‍රිස්තියානි දේවගැතිවරයා ජනවාරි මස පළමු වනදා දක්වා රිමාන්ඩ් බන්ධනාගාරගතකර තිබේ.
සැකකාර දේවගැතිවරයා අලුත්කඩේ මහේස්ත්‍රාත් අධිකරණය හමුවට ඉදිරිපත් කිරීමෙන් අනතුරුව මෙම නියෝගය ලබා දී ඇත.
කාන්තා නේවාසිකාගාරයක රැඳී සිටින දැරියන් පිරිසකට ලිංගික අතවර කළ බව කියන 63 හැවිරිදි ක්‍රිස්තියානි දේවගැතිවරයෙකු කිරුළපන පොලිසියේ ළමා හා කාන්තා කාර්යාංශය මගින් අත්අඩංගුවට ගනු ලැබීය.
සැකකාර දේවගැතිවරයා තමන්ට අතවර කළ බවට වැල්ලවත්තේ ප්‍රසිද්ධ පාසලක දැරියක් විදුහල්පතිනියට කළ දැනුම්දීමකින් පසුව සිදුකළ විමර්ශනයකදී ඔහුව අත්අඩංගුවට ගෙන තිබේ.
රැකියාවක නිරත 23 හැවිරිදි තරුණියක් සහ වයස අවුරුදු 11ත් 18ත් අතර පාසල් සිසුවියන් 8 දෙනෙක් එම නේවාසිකාගාරයේ රැදී සිටින බවත්, ඔවුන්ගෙන් 6 දෙනෙකු පවුල් තුනක සහෝදරියන් බවත් පොලිසිය සඳහන් කළේය.
ඔවුන්ගෙන් පොලිසිය කළ ප්‍රශ්න කිරීම්වලදී අනාවරණ වී ඇත්තේ අදාළ දේවගැතිවරයා වසර කිහිපයක සිට දැරියන් 5 දෙනෙකුට විවිධ අතවර සිදුකර ඇති බවය.
ඔවුන් වෛද්‍ය පරීක්ෂණ සඳහා යොමු කර ඇති අතර, සැකකාර දේවගැතිවරයා අත්අඩංගුවට ගැණුනේ එම දැරියන්ට පෙන්වූ බව කියන අසභ්‍ය දර්ශන ඇතුළත් ජංගම දුරකථනයද සමගය.
දේවස්ථානයකට අනුබද්ධ අදාළ නේවාසිකාගාරය ලියාපදිංචියකින් තොරව පවත්වාගෙන ගොස් ඇති බවද මූලික විමර්ශනවලින් හෙළි වූ බව පොලිසිය පවසයි.