කලහකාරී ලෙස හැසිරුණු මත්ද්‍රව්‍ය ජාවාරම්වලට සම්බන්ධ සැකකරුවන් පිරිසක් කඩු 4ක් සමග කොළඹ අපරාධ කොට්ඨාසය විසින් අත්අඩංගුවට ගෙන තිබේ.
පෑලියගොඩ පොලිස් වසමේ කොළඹ අපරාධ කොට්ඨාසයේ සංවිධානාත්මක අපරාධ විමර්ශන ඒකකයේ නිලධාරීන්ට ලද තොරතුරක් මත එම වැටලීම සිදුකර තිබුණි.
එහිදී කලහකාරීව හැසිරුණු සැකකරුවන් 8 දෙනෙකු හා සැකකාරියන් 3 දෙනෙකු කඩු 4ක් සමග පොලිස් භාරයට ගෙන තිබේ.
අත්අඩංගුවට ගත් සැකකරුවන් අවුරුදු 23ත් 35ත් අතර වයස්වල පසුවන අතර සැකකාරියන් අවුරුදු 26, 46 හා 47 වයස්වල පසුවන කැලණිය ප්‍රදේශයේ පදිංචිකරුවන්ය.
පෑලියගොඩ ප්‍රදේශයේ දෙපිරිසක් අතර කාලයක් සිට පවතින ආරවුලක් සම්බන්ධයෙන් ලද තොරතුරක් මත මෙම වැටලීම සිදුකර ඉහත පිරිස අත්අඩංගුවට ගෙන ඇත.
එම පිරිස අතුරින් 7දෙනෙකු පෑලියගොඩ පොලීසිය වෙත වාර්තා වී ඇති අපරාධ කිහිපයකට අවශ්‍ය කර සිටි සැකකරුවන් බවට වාර්තා වේ.
එම සැකකරුවන් හා සැකකාරියන් මත්ද්‍රව්‍ය ජාවාරම පාදක කරගෙන කලහකාරීව හැසිරෙමින් නිරන්තරයෙන් ගැටුම් ඇති කරගන්නා පිරිසක් බවත්, විදේශ ගතව සිටින මත්ද්‍රව්‍ය ජාවාරම්කරුවෙකුගේ මෙහෙයවීම මත මොවුන් එම ජාවාරමේ නිරතව සිටින බවත් වැඩිදුර විමර්ශනයේ දී අනාවරණය වී තිබේ.
කොළඹ අපරාධ කොට්ඨාසය වැඩිදුර විමර්ශන සිදුකරයි.