අනියම් සැමියා සමග එක්ව සිය සැමියාව මෝටර් රථයකින් හප්පා මරා දැමීමේ සිද්ධියක් සම්බන්ධයෙන් කාන්තාවක් ඇතුළු තිදෙනෙක් අත්අඩංගුවට ගෙන තිබේ.
එලෙස අත්අඩංගුවට පත්වූ මිය ගිය පුද්ගලයාගේ බිරිඳ, ඇගේ අනියම් සැමියා සහ තවත් අයෙක් ලබන 8 වනදා දක්වා රක්ෂිත බන්ධනාගාරගත කිරීමට මාවනැල්ල මහෙස්ත්‍රාත් අධිකරණය ඊයේ (30) නියෝගය කර ඇත.
පසුගිය ජූලි මස 27 වනදා මාවනැල්ල, ගලතර ප්‍රදේශයේ මාර්ගය අසල තුවාල සහිතව වැටී සිටි පුද්ගලයෙකු මාවනැල්ල රෝහලට ඇතුළත් කරන විටත් මියගොස් තිබුණි.
එම මරණය සම්බන්ධයෙන් කෑගල්ල මහ රෝහලේ අධිකරණ වෛද්‍ය සංකීර්ණයේ දී පශ්චාත් මරණ පරීක්ෂණය පැවත්වු අතර එහිදී විවෘත තීන්දුවක් ලබා දී තිබුණි.
ඒ අනුව මියගිය පුද්ගලයාගේ බිරිඳ විසින් සිරුර භාරගෙන අවසන් කටයුතු සිදුකර ඇති බව ද වාර්තා වේ.
කෙසේවෙතත් මාස තුනක් පුරා මෙම මරණය සම්බන්ධයෙන් මාවනැල්ල පොලීසියේ අපරාධ විමර්ශන අංශය විසින් මියගිය පුද්ගලයාගේ බිරිඳගේ දුරකථන වාර්තා විශ්ලේෂණය කරමින් පරීක්ෂණ සිදුකර තිබුණි.
එහිදී අනාවරණය වී තිබුණේ, මියගිය පුද්ගලයාගේ බිරිඳ, ඇයගේ අනියම් සැමියා සමග එක්ව මෝටර් රථයකින් ගොස් සැමියාව අනතුරට ලක්කර පළා ගොස් ඇති බවය.
එම අනතුරින් 43 හැවිරිදි ගැමුණු කුමාර නැමති තිදරු පියෙක් ජීවිතක්ෂයට පත්වුණි.
පසුව මාවනැල්ල පොලීසිය සිදුකළ විමර්ශන අනුව ඝාතනයට සම්බන්ධ බිරිඳ වන 41 හැවිරිදි කාන්තාවක් සහ ඇගේ අනියම් සැමියා වන හිඟුල ප්‍රදේශයේ පදිංචි ව්‍යාපාරිකයෙකු හා අනතුරට ලක්කළ මෝටර් රථය පැදවූ රියදුරුව අත්අඩංගුවට ගෙන මාවනැල්ල දිසා මහෙස්ත්‍රාත් අධිකරණය හමුවට ඉදිරිපත් කෙරිණි.