ඊශ්‍රායල හමාස් යුද ගැටුම් ආරම්භ වී මේ වනවිට දින 16 ක් ගතව ඇත.
ගැටුම්වලින් දෙපාර්ශ්වයේම සිදුව ඇති මරණ ගණන 5,600කට අධිකයි.
ඊශ්‍රායලය පලස්තීන වැසියන් ඉලක්ක කරගත් ප්‍රහාර තවත් තීව්‍ර කරමින්, ගාසා තීරයට අමතරව බටහිර ඉවුර වෙතත් ගුවන් ප්‍රහාර ආරම්භ කර තිබේ.
අඩ මසක කාලයක් තිස්සේ ජලය, ආහාර, විදුලිය සහ ඉන්ධන නොමැතිව හුදකලාව තිබූ ගාසා තීරය වෙත පළමු මානුෂීය ආධාර තොගය පසුගිය (21) යොමු කෙරුණි.
ඒ ඊජිප්තුවේ රෆා දේශසීමා පිවිසුම විවෘත කිරීමෙන් අනතුරුවය.
හමාස් ප්‍රහාරයට ප්‍රතිචාර ලෙස ඊශ්‍රායලය, ගාසා තීරය වෙත විදුලි සැපයුම විසන්ධි කළේ මීට දෙසතියකට පමණ පෙරය.
ඉන් අනතුරුව එහි රෝහල් හි අත්‍යවශ්‍ය සේවා පවත්වාගෙන ගියේ ගබඩා කරගත් ඉන්ධන භාවිත කරමිනි.
මෙම ඉන්ධන ද අවසන් වීමෙන් රෝහල්වල දැඩි සත්කාර ඒකක පවත්වාගෙන යාමට නොහැකිව ඇත්තේ රෝගී බිලිඳුන් රැසකගේ ජීවිත අවදානමේ හෙලමිනි.
ගාසා හි ෂිෆා රෝහලේ ළමා දැඩි සත්කාර ඒකකයේ වත්මන් තත්ත්වය එහි වෛද්‍යවරියක් මෙලෙස පැහැදිලි කළාය.
“අපි සතු ඉන්ධන ප්‍රමාණවත් වන්නේ පැය 8ක කාලයකට විතරයි. ඉන් පස්සේ උණුසුම නොමැතිව ඔවුන් හැමදෙනාම මියයයි. ඔවුන්ට ඔක්සිජන් අවශ්‍යයි. ඔවුන්ගේ ජීවිත රඳාපවතින්නේ විදුලිය මත. මේ යන්ත්‍ර මත. විදුලිය නැතිව මේ යන්ත්‍රය අක්‍රිය වෙනවා. අපිට කෑමක් නෑ. බෙහෙත් නැහැ. ජලය නැහැ. මෙය ඇත්තෙන්ම මුළු ලෝකයටම නින්දාවක්. මේ බිලිඳුන් තව පැය කිහිපයකින් මියයාවි.”
මේ අතර ගාසා හි දෙමාපියන් සිය දරුවන්ගේ අත්වල ඔවුන්ගේ නම සටහන් කර ඇත.
ඔවුන්ට මෙලෙස කටයුතු කිරීමට සිදුව ඇත්තේ යම් හෙයකින් දරුවන් මියගියහොත් මළසිරුරු හඳුනාගැනීම සඳහාය.