බිංගිරිය පොලිස් ස්ථානයට කඩා වැදී රාජකාරියේ නිරත වෙමින් සිටි රථ වාහන අංශයේ ස්ථානාධිපතිවරයාට බැන වැදුණු බව කියන කාන්තාවක් මෙම මස 21 වැනිදා දක්වා රක්ෂිත බන්ධනාගාරගත කර තිබේ.
හෙට්ටිපොළ මහෙස්ත්‍රාත්වරයා විසින් මෙම නියෝගය ලබා දී ඇති අතර, සැකකාරිය හිඟුරක්ගොඩ, තානායම පාර පදිංචි කාන්තාවක් බව වාර්තා වේ.
ඉකුත් 19 වැනිදා දහවල් කාලයේ දී තමන් පොලිස් ස්ථානයේ නිල කාමරයේ රාජකාරියේ නිරත වෙමින් සිටින අතරතුර එක් කාන්තාවක් පැමිණ තමාට පරුෂ වචනයෙන් බැන වැද රාජකාරියට බාධා කළ බවට පැමිණිලිකාර පොලිස් නිලධාරියා සඳහන් කර ඇත.
පැමිණිල්ල ඉදිරිපත් කර ඇත්තේ, බිංගිරිය පොලිස් ස්ථානයේ රථ වාහන අංශයේ ස්ථනාධිපති පොලිස් පරීක්ෂක සුජිත් ප්‍රියංකර යන අය විසිනි.
පැමිණිල්ල අනුව ක්‍රියාත්මක වී ඇති පොලිස් නිලධාරින් බිංගිරිය, බෝවත්ත බස් නැවතුම්පොළ අසල රැඳී සිටින විට සැකකාර කාන්තාව අත්අඩංගුවට ගෙන තිබේ.
පැමිණිලිකාර පොලිස් පරීක්ෂකවරයා කටුනායක ප්‍රදේශයේ රාජකාරි කටයුතු සිදු කරන කාලයේ සැකකාරිය සමඟ සබඳතාවක් පවත්වා ඇති බව මූලික විමර්ශනවල දී අනාවරණය වී ඇත.
එම සබඳතාව නවත්වා දැමූ නමුත් පැමිණිලිකාර පොලිස් නිලධාරියා පසු ව සේවය කරන සෑම පොලිස්
ස්ථානයක් වෙතම ගොස් සැකකාරිය කලහකාරී ලෙස හැසිරී ඇති බව විමර්ශනවල දී අනාවරණය වී තිබේ.
සිද්ධිය පිළිබඳ බිංගිරිය පොලිසිය වැඩිදුර විමර්ශන සිදු කරයි.