පාර්ලිමේන්තු මන්ත්‍රී උද්දික ප්‍රේමරත්න මහතාගේ රථයට වෙඩිතැබීමේ සිද්ධියට සම්බන්ධ සියලු සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙස අනුරාධපුර ප්රධාන මහෙස්ත්‍රාත්වරයා අනුරාධපුර පොලීසියට නියෝග කර තිබේ.
වෙඩික්කරුවන් හඳුනාගැනීමට පොලිස් බුද්ධි අංශවල සහ පෞද්ගලික ඔත්තුකරුවන්ගේ සහාය ද ලබාගන්නා ලෙස එහිදී වැඩිදුරටත් නියෝග කර ඇත.
අනුරාධපුර ප්රධාන මහෙස්ත්රාත් සහ අතිරේක දිසා විනිසුරු නාලක සංජීව ජයසූරිය මහතා මෙම නියෝග නිකුත් කර තිබේ.
එම සිද්ධිය සම්බන්ධයෙන් සිදුකෙරෙන විමර්ශනවල ප්‍රගතිය දැක්වෙන වාර්තාවක් අධිකරණය හමුවට ඉදිරිපත් කරන ලෙසට ද එහිදී දැනුම්දී ඇත.
අනුරාධපුර ප්රධාන මහෙස්ත්රාත් නාලක සංජීව ජයසූරිය මහතා මෙසේ නියෝග කළේ, අනුරාධපුර දිස්ත්‍රික් පාර්ලිමේන්තු මන්ත්‍රි උද්දික ප්‍රේමරත්න මහතා ඉලක්ක කරගනිමින් වෙඩි ප්‍රහාර 02ක් එල්ල කිරීමේ සිද්ධිය සම්බන්ධයෙන් අනුරාධපුර මූලස්ථාන පොලීසිය බී වාර්තාවක් මගින් අධිකරණයට කළ කරුණු දැක්වීමක් සැලකිල්ලට ගනිමිනි.
ඉකුත් 17 වනදා රාත්‍රියේදී අනුරාධපුර දිස්ත්‍රික් පාර්ලිමේන්තු මන්ත්‍රී උද්දික ප්‍රේමරත්න මහතාගේ නිවස අසලදී මෙම වෙඩිතැබීම සිදුකර තිබුණි.
සිද්ධිය සම්බන්ධයෙන් පාර්ශ්ව කිහිපයකින් ප්‍රකාශ සටහන් කරගෙන ඇති බවද පොලීසිය පවසයි.
කෙසේවෙතත් සිද්ධියට සම්බන්ධ සැකකරුවන් මෙතෙක් හඳුනාගෙන නොමැත.