මත්ද්‍රව්‍ය ජාවාරම් කිරිමේ චෝදනාව යටතේ අත්අඩංගුවට පත් කාන්තාවකට අයත් මහනුවර කුණ්ඩසාලේ මහවත්ත ප්‍රදේශයේ පිහිටි රුපියල් කෝටි ගණනක් වටිනා දේපොළ අධිකරණ නියෝගයක් මත කුණ්ඩසාලේ ප්‍රාදේශීය ලේකම් බාරයට පත් කළේය.
එම වත්කම් උපයාගත් ආකාරය සම්බන්ධයෙන් නීති විරෝධී වත්කම් විමර්ශන කොට්ඨාසයට පැහැදිලි තොරතුරු ලබාදීමට අදාළ කාන්තාව අපොහොසත් වීම හේතුවෙන් ඒ සම්බන්ධයෙන් මහාඅධිකරණයට කරුණු වාර්තා කිරීමෙන් අනතුරුව අදාල තුන් මහල් ගොඩනැගිල්ල සහ ඉඩම කුණ්ඩසාලේ ප්‍රාදේශීය ලේකම්වරිය යටතට පත් කරන ලෙස මහාධිකරණය නියෝග කොට තිබුණි.
ඒ අනුව කුණ්ඩසාලේ ප්‍රාදේශීය ලේකම්වරියගේ නිසි අවසරයක් නොමැතිව එම දේපොළ කිසිවකුටත් පැවරීම, විකිණීම හෝ වෙනයම් කටයුත්තක් සඳහා යොදා ගැනීම එහි හිමිකරුට නොහැකි වනු ඇත.
නීති විරෝධී වත්කම් විමර්ශන කොට්ඨාශය විසින් මුදල් විශුද්ධිකරණ වැළැක්වීමේ පනතේ ප්‍රතිපාදන යටතේ අදාළ දේපොළ ක්‍රියා විරහිත කිරීමේ නියෝගයක් ලබා දෙන ලෙස කළ ඉල්ලීමක් සලකා බැලීමෙන් පසු මහාධිකරණය මගින් අදාළ නියෝගය ලබාදී තිබේ.