සැකකටයුතු ලෙස මියගිය කාන්තාවකගේ මළ සිරුරක් බවට සැකකරන විකෘති වූ හිස කොටසක් ගමන් මල්ලක තිබී සොයාගෙන තිබේ.
එසේම ඇගේ වම් අත ද ඒ ආසන්නයේම තිබී සොයා ගෙන ඇත.
ඊයේ (16) එම ශරීර කොටස් සොයාගෙන ඇති බව පොලිසිය පැවසීය.
එසේ මියගිය කාන්තව වයස අවුරුදු 76ක් වූ රුක්වුඩ් වත්ත, හේවාහැට ප්රදේශයේ පදිංචිකාරියක බව සොයාගෙන තිබේ.
පසුගිය 02 වැනිදා හඟුරන්කෙත පොලිස් වසමේ රුක්වුඩ් වත්ත ප්රදේශයේ පදිංචි කාන්තාවක් නිවසින් පිට ව ගොස් නැවත නිවසට නොපැමිණීමක් සම්බන්ධයෙන් පසුගිය 06 වැනිදා එම කාන්තාවගේ පුතා විසින් හඟුරන්කෙත පොලිසියට පැමිණිල්ලක් දමා තිබිණි.
පසු ව පැමිණිලිකරු වන පුතා තම මව පිළිබඳ ප්රදේශවාසීන් සමඟ සොයා බැලීමේ දී පසුගිය 09 වැනිදා මතුරට පොලිස් වසමේ ඔකඳගල ගල් කන්ද පාමුල අතුරුදන් කාන්තාවගේ හිස හා වම් අත නොමැතිව නරක් වී ඇති මෘත ශරීරය හමු ව ඇත.
ඒ සම්බන්ධයෙන් මතුරට පොලිසිය වෙත දැනුම් දීම පරිදි එම සිරුර සම්බන්ධයෙන් හදිසි මරණ පරික්ෂණයක් සිදු කර මෘත දේහය නුවරඑළිය රෝහල වෙත යොමු කිරීමෙන් පසු අධිකරණ වෛද්යවරයා විසින් කරන ලද පරික්ෂාවේ දී මෙය මනුෂ්ය ඝාතනයක් බවට සැකකරන බවට නිගමනට කර තිබේ.
ඒ අනුව පොලිසිය විසින් සිදු කළ විමර්ශනයේ දී ඊයේ එම කාන්තාවගේ විකෘති වූ හිස කොටස සහ වම් අත කොටස එසේ සොයාගෙන ඇති අතර, එය නුවරඑළිය රෝහලේ මෘත ශරීරාගාරයේ තැන්පත් කර ඇත.
සිද්ධිය සම්බන්ධයෙන් මතුරට පොලිසිය සහ හඟුරන්කෙත පොලිසිය වැඩිදුර විමර්ශන සිදු කරයි.