ව්‍යාජ විදේශ රැකියා නියෝජිත ආයතනයක් පවත්වාගෙන ගිය අඹුසැමි යුවළක් හා තවත් පුද්ගලයෙකු ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන ඒකකයේ නිලධාරීන් විසින් අත්අඩංගුවට ගෙන තිබේ.
කුරුණෑගල ප්‍රදේශයේ පවත්වාගෙන ගිය විදේශ අධ්‍යාපන ආයතනයක් මඟින් ඩුබායි රාජ්‍යයේ රැකියා ලබාදීම සඳහා එක් අයෙකුගෙන් රු.760,000 බැගින් මුදල් ලබාගෙන පොරොන්දු වූ පරිදි රැකියාව ලබානොදුන් බවට පුද්ගලයින් දෙදෙනෙකු විසින් කළ පැමිණිල්ලක් මත එම ආයතනය වටලා ඇත.
කාර්යාංශයේ වලංගු බලපත්‍රයක් නොමැතිව නීත්‍යානුකූල නොවන අයුරින් විදේශ රැකියා නියෝජිතායතනයක් පවත්වාගෙන යාම හා විදේශ රැකියා සඳහා බඳවාගැනීම යන චෝදනා 2 යටතේ අඹුසැමි යුවළක් හා ඔවුන්ගේ ඥාති සහෝදරයෙකු එහිදී විමර්ශන නිලධාරීන් විසින් අත්අඩංගුවට ගෙන තිබේ.
වැටලීම සිදුකරන අවස්ථාවේදී එම ස්ථානයේ තිබී විදේශ ගමන් බලපත්‍ර 4ක් හා විදේශ රැකියා ලබාදීමට අදාළ වන ලේඛන රැසක් නිලධාරීන් භාරයට ගෙන ඇත.
අත්අඩංගුවට ගත් සැකකරුවන් කුරුණෑගල මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව, නීත්‍යානුකූල නොවන අයුරින් විදේශ රැකියා ආයතනයක් පවත්වාගෙන යාමේ චෝදනාව යටතේ අත්අඩංගුවට ගත් කාන්තාවට හා ඇයගේ ඥාති සහෝදරයා හට රුපියල් ලක්ෂ 5 බැගින් වූ ශරීර ඇප 2 බැගින් නියම කර, විදේශ ගමන් තහනමක්ද පනවා තිබේ.
වලංගු රැකියා ඇණවුමක් ලබාගැනීමෙන් තොරව විදේශ රැකියා ලබාදීම සඳහා මුදල් අයකිරීමේ චෝදනාව මත අඹුසැමි යුවළට පැමිණිලි 2ට අදාළව එක් පැමිණිල්ලක් සඳහා රුපියල් ලක්ෂ 7 බැගින් වූ ශරීර ඇප 2ක් බැගින් හා රුපියල් 10,000.00 බැගින් මුදල් ඇප නියම කර ඇත.
වැඩිදුර නඩු විභාගය 2023 නොවැම්බර් මස 17 දින යළි කැඳවීමට නියමිතය.