බත්තරමුල්ල, දකුණු තලංගම, කොරාව ප්‍රදේශයේ දී පුද්ගලයකුට වෙඩි තබා ඝාතනය කර මෙරටින් සිංගප්පූරුවට පළා ගිය සැකකරැවෙකු නැවත මෙරටට ගෙන්වාගෙන පොලීසිය විසින් අත්අඩංගුවට ගෙන තිබේ.
කටුනායක ගුවන් තොටුපොළේ දී අද (31) දින සැකකරු අත්අඩංගුවට ගත් බව අතුරැගිරිය පොලීසිය පවසයි.
ඉකුත් 25 වන දින තංගල්ල, කොරාව ප්‍රදේශයේ දී පොලී මුදල් ලබා දෙන්නකු බව පැවසෙන පුද්ගලයකුට වෙඩි තබා ඝාතනය කර තිබිණි.
ඝාතනය සඳහා වෙඩික්කරු පැමිණි යතුරු පැදියේ පැදිකරු මෙලෙස අත්අඩංගුවට ගෙන ඇත.
සැකකරු මෙරටින් සිංගප්පූරුව බලා පළා යන බවට නුගේගොඩ පොලිස් කොට්ඨාසය භාර ජ්‍යේෂ්ඨ පොලිස් අධිකාරී ජේ.පී.එස් ජයමහ මහතාට තොරතුරක් ලැබී තිබේ.
ඒ අනුව, ගුවන් යානය පිටව යන අවස්ථාවේ දී සැකකරුට එරෙහිව විදෙස් ගමන් තහනමක් ලබාගෙන ඇත.
පසුව සැකකරු සිංගප්පූරුවට ගොඩ බැස සිටිය දී එරට බලධාරීන් විසින් ආපසු හරවා ලංකාවට එවා ඇති අතර, කටුනායක ගුවන් තොටුපොළේ දී ඔහුව අත්අඩංගුවට ගෙන ඇත.
අත්අඩංගුවට ගෙන ඇත්තේ, අතුරැගිරිය ප්‍රදේශයේ පදිංචි 23 හැවිරිදි පුද්ගලයෙකි.
අතුරැගිරියේ ලඩියාගේ කල්ලියේ දැනුම්දීම මත මෙම සැකකරු විසින් අදාළ ඝාතනයට යොමුව ඇති බව සිදුකළ විමර්ශනවල දී අනාවරණය වී ඇතැයි පොලීසිය සඳහන් කරයි.
සැකකරු කඩුවෙල මහේස්ත්‍රාත් අධිකරණය වෙත ඉදිරිපත් කර රැඳවුම් නියෝග ලබා තවදුරටත් ප්‍රශ්න කිරීමට නියමිත බව වාර්තා වේ.