මහා පරිමාණ කොල්ල කල්ලියක ප්‍රධාන සැකකරු ඇතුළු සිව්දෙනෙකු පූගොඩ පොලීසිය විසින් අත්අඩංගුවට ගැනීමට සමත්ව තිබේ.
පොලීසිය පැවසුවේ මෙම පිරිස අතර කාන්තාවන් දෙදෙනකුද සිටින බවය.
සැකකරුවන් රටපුර පිහිටි විවිධ ව්‍යාපාරික ස්ථානවලට රාත්‍රී කාලයේ ඇතුලුවී මෙලෙස භාණ්ඩ සොරකමේ නිරතව සිට ඇති බව අනාවරණය වී ඇත.
පූගොඩ ප්‍රදේශයේ පිහිටි රෙදිපිළි අලෙවි සැලකට ඇතුලුවී එහි භාණ්ඩ සොරාගෙන ඇති බවට ලද පැමිණිල්ලකට අනුව මෙම සැකකරුවන් හලාවත – දැදුරු ඔය ප්‍රදේශයේදී පොලීසිය විසින් අත්අඩංගුවට ගෙන ඇත.
එහිදී පොලීසිය විසින් කුඩා ලොරි රථයක් සහ ඔවුන් සන්තකයේ තිබූ ලක්ෂ 10ක් පමණ වටිනා රෙදි තොගයක්, ගෑස් සිලින්ඩර් 27ක් සහ බීම බෝතල් තොගයක් ද පොලිස් භාරයට ගෙන ඇත.
සැකකරුවන් සහ සැකකාරියන් අතර සිටි තිදෙනෙකු දැදුරුඔය ප්‍රදේශයේ පදිංචිකරුවන් වන අතර එක් සැකකරුවෙකු පාදුක්ක ප්‍රදේශයේ පදිංචිකරුවෙකු බවට අනාවරණය වී තිබේ.
මෙම සිද්ධියේ ප්‍රධාන සැකකරු රටපුරා විවිධ අධිකරණ වල පවතින නඩු 21 ක් සම්බන්ධයෙන් වරෙන්තුකරුවෙකු වී සිටින බවත්, පූගොඩ, මාදම්පේ , හෙට්ටිපොල, මදුරංකුලිය, පල්ලේවෙල, පුත්තලම , අවිස්සාවේල්ල ඇතුළු ප්‍රදේශ ගණනාවක සිදු කළ අපරාධ 11 කට සම්බන්ධ බවට මෙතෙක් සිදුකරන ලද විමර්ෂණවලදී අනාවරණය වී ඇති බවත් පොලීසිය පැවසීය.