නැගෙනහිර පළාතේ ඉඩම් අක්කර විශාල ප්‍රමාණයක් හිතුමතේට විවිධ පාර්ශ්වයන් වෙත ලබාදී ඇතැයි ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවැති නැගෙනහිර පළාතේ සංවර්ධන කමිටුවේදී අනාවරණය වී ඇත.
ත්‍රිකුණාමලය දිස්ත්‍රික්කයේ ආගමික ස්ථාන සඳහා ඉඩම් අවිධිමත් ආකාරයෙන් ඉඩම් ලබාදී ඇති බවද මඩකලපුව දිස්ත්‍රික්කයේ මහවැලි සංවර්ධනය ව්‍යාපෘතිය සඳහා ලබාදී තිබූ ඉඩම් අක්කර විශාල ප්‍රමාණයක් වනජීවී දොර්තමේන්තුව විසින් රක්ෂිතයක් ලෙස නැවත ගැසට් කර තිබෙන බවටද මෙහිදී තොරතුරු අනාවරණය වී තිබේ.
ත්‍රිකුණාමලය තිරියාය විහාරයට අක්කර 3065 ක භූමි ප්‍රදේශයක්ද ඉල්ලා ඇති බව මෙහිදී අනාවරණය වූ අතර එය පාර්ලිමේන්තුවේ තේරීම් කාරක සභාව මඟින් ඉඩම් අක්කර 265ක් දක්වා අඩු කර ලබාදීමට තීරණය කර තිබේ.
එමෙන්ම මඩකලපුව හා පොළොන්නරුව දිස්ත්‍රික්කය මායිම් වන මහවැලි සංවර්ධන ව්‍යාපෘතිය සඳහා 1985 වසරේ ගැසට් කළ අක්කර 45,000ක කොටස මේ වන විට වනජීවි දෙපාර්තමේන්තුව මඟින් රක්ෂිතයක් බවට ගැසට් කර ඇත.
එම සංවර්ධන ව්‍යාපෘතියේ ඉඩම් රක්ෂිතයක් බවට පත් කළේ කුමන පදනමකින් දැයි මෙතෙක් අනාවරණය වී නොමැත.
එම ඉඩම් අක්කර 45,000ක කොටස රක්ෂිතයක් බවට පත් කරමින් ඉඩම් කොල්ලයක් සිදුව ඇතැයි මෙහිදී අදහස් මතු වී ඇත. ඒ අනුව 2019-2023 කාලසීමාවෙි නැගෙනහිර පළාතේ ඉඩම් ලබාදීම සම්බන්ධයෙන් වාර්තාවක් සතියක් ඇතුලත ලබාදෙන ලෙස ජනාධිපතිවරයා නිලධාරීන්ට නියෝග කර තිබේ