වගා කටයුතුවලදී හානිකර කෘමීන් විනාශ කිරීම සඳහාත් අස්වනු ඉහළ නැංවාගැනීම සඳහාත් ගොවීන් විවිධ රසායනික පළිබෝධනාශක භාවිත කරයි.
එවැනි පළිබෝධ නාශකවල ප්‍රමිතිය හා යෝග්‍යතාව පිළිබඳව සමීක්ෂණ පවත්වනු ලබන්නේ ”ජාත්‍යන්තර පළිබෝධනාශක ක්‍රියාකාරි ජාලය” විසිනි.
කෙසේ වෙතත් එම ජාලය 2022 වසරේදී ”අධි අන්තරායකර” සහ ”වගාවන් සඳහා භාවිතයට නුසුදුසු” ලෙස නම් කර ඇති පළිබෝධනාශක වර්ග 40ක් තවමත් මෙරට වගා සඳහා යොදාගන්නා බවට පරිසර යුක්ති කේන්ද්‍රයේ විශේෂ පර්යේෂණ කණ්ඩායමක් දිස්ත්‍රික්ක 09ක් ඇසුරින් සිදුකළ සමීක්ෂණයකින් හෙළි වී තිබේ.
ඒ සමහර පළිබෝධ නාශක ඇතැම් රටවල තහනමට පවා ලක් කර ඇති ඒවා වීම විශේෂත්වයකි.
නමුත් විමතියට කරුණ නම් මෙම රසායනික පළිබෝධනාශක 40 මෙරට භාවිතයට සුදුසු බවට 2016 නොවැම්බර් 24වනදා නිකුත් කරන ලද ගැසට් නිවේදනයෙන් පළිබෝධනාශක රෙජිස්ට්‍රාර් කාර්යාලය අනුමත කර තිබීමය.
ඒ අනුව මාධ්‍ය මේ සම්බන්ධයෙන් පළිබෝධනාශක රෙජිස්ට්‍රාර් කාර්යාලයෙන් විමසූ විට එහි ඉහළ නිලධාරියකු සඳහන් කළේ ජාත්‍යන්තර වශයෙන් තහනමට ලක්ව ඇති කිසිදු පළිබෝධනාශක වර්ගයක් මෙරට භාවිතයට අනුමත කර නොමැති බවය.
තොරතුරුවල පවතින පරස්පරතාව හේතුවෙන් මේ පිළිබඳව කෘෂිකර්ම අමාත්‍ය මහින්ද අමරවීර මහතාගෙන් විමසීය.
අමාත්‍යවරයා ප්‍රකාශ කළේ රජය නිකුත් කර ඇති ගැසට් නිවේදනය හා ජාත්‍යන්තර වශයෙන් තහනම් කළ පළිබෝධනාශක සම්බන්ධයෙන් විශේෂ වාර්තාවක් පළිබෝධනාශක රෙජිස්ට්‍රාර් කාර්යාලයෙන් ඉල්ලා ඇති අතර ඉදිරියේදී ඊට අනුව ක්‍රියාකරන බවය.