තියුණු ආයුධයකින් කපාකොටා දොඩංගොඩ නිවසක් තුළදී අද (14) අලුයම එක්දරු පියෙකු ඝාතනය කර ඇති බව දොඩංගොඩ පොලීසිය පවසයි.
මෙසේ ඝාතනයට ලක්ව ඇත්තේ දොඩංගොඩ, දොලේලන්ද ප්රදේශයේ පදිංචිව සිටි මාතර ආරච්ච්ගේ දිමුත් චාමික නමැති 37 හැවිරිදි එක්දරු පියෙකු බව පොලීසිය සඳහන් කළේය.
මියගොස් ඇති තැනැත්තාගේ නිවස අලුත්වැඩියා කරන බැවින් සිය බිරිඳ සහ එකම දරුවා සමග බිරිඳගේ නිවසෙහි රැඳී සිටියදී ඝාතනයට ලක්ව ඇති බවද පොලීසිය සඳහන් කළේය.
අලුයම 2 .30ට පමණ නිවසෙහි ඉදිරිපස සහ පසු දොරවල් කඩා ඇතුළුවූ ඝාතකයින් තියුණු ආයුධවලින් පහරදී ඇති බවට පොලීසියට අනාවරණය වී තිබේ.
පහරකෑමට ලක්ව බරපතළ තුවාල ලබා සිටි පුද්ගලයා පෞද්ගලික වාහනයකින් කළුතර නාගොඩ ශික්ෂණ රෝහලට රැගෙන ගොස් ඇති බවත්, රෝහල් ගතකිරීමේදී මියගොස් ඇති බවත් රෝහල් ආරංචි මාර්ග සඳහන් කළේය.
සැකකරුවන් හඳුනාගෙන ඇති බවත් ඔවුන් මේ වනවිට ප්රදේශයෙන් පළාගොස් ඇති බව වාර්තා වේ.
ඝාතනයට ලක්ව ඇති තැනැත්තා සහ සැකකරුවන් මතුගම ප්රදේශයේ ප්රභල මත්ද්රව්ය ජාවාරම්කරුවෙක් සමග සමීපව සිට පසුව වසරක පමණ සිට අමනාපව ඇති බවත්, ඝාතනයට සැක පුද්ගලයෙකුගේ නිවසකට පසුගිය මාසයේ දිනක තවත් පිරිසක් සමග ගොස් ඝාතනය වූ පුද්ගලයා පහරදීමක් සිදුකර ඇති බවටත් තොරතුරු ලැබී ඇතැයිද උසස් පොලිස් නිලධාරීයෙක් පැවසීය.
සැකකරුවන් මෙතෙක් අත්අඩංගුවට ගෙන නොමැති අතර, කළුතර කොට්ඨාස අපරාධ ස්ථාන පරීක්ෂණාගාර නිලධාරීන් පරීක්ෂණ සිදුකරයි.