අවුරුදු දාහතරක් වයසැති බාල වයස්කාර තම දියණියව ලිංගික අපයෝජනය සදහා මුදලට විකිණූ කාන්තාව, එළැඹෙන 22 දින දක්වා රිමාන්ඩ් බන්ධනාගාර භාරයේ තබන ලෙසට මිනුවන්ගොඩ වැඩ බලන මහේස්ත්‍රාත් අතුල ගුණසේකර මහතා ඊයේ (11) නියම කර තිබේ.
එසේම, දැරිය ලිංගික අපයෝජනයට ලක් කළ සැකකරුවන් දෙදෙනෙකු ද එළැඹෙන 22 දින දක්වා රිමාන්ඩ් බන්ධනාගාර භාරයේ තැබීමට අධිකරණය නියෝග කර ඇත.
දිවුලපිටිය, වෙලගාන ප්‍රදේශයේ පදිංචි 43 හැවිරිදි සිව් දරු මවක් මෙසේ රිමාන්ඩ් බන්ධනාගාරගත කෙරිණි.
ඇනෙක් සැකකරුවන් දෙදෙනා දිවුලපිටිය, උල්ලලපොළ ප්‍රදේශයේ පදිංචි 52 හැවිරිදි පුද්ගලයකු හා මිනුවන්ගොඩ, නිල්පනාගොඩ පදිංචි 42 හැවිරිදි පුද්ගලයකු බව වාර්තා වෙයි.
මේ අතර, සැකකාරිය සහ සැකකරුවන් දෙදෙනා මීගමු මහ රෝහලේ සමාජ රෝග සම්බන්ධ විශේෂඥ අධිකරණ වෛද්‍ය නිලධාරියා වෙත ඉදිරිපත් කර සමාජ රෝග සම්බන්ධ වාර්තාවක් සමඟ එළැඹෙන 22 වනදාට අධිකරණය හමුවට ඉදිරිපත් කරන ලෙස අධිකරණයෙන් මීගමු බන්ධනාගාර අධිකාරි වෙත නියම කර ඇත.
එසේම වෛද්‍ය පරීක්ෂණය සඳහා රෝහල්ගත කර සිටින වින්දිත දැරිය පරිවාස වාර්තාව ලැබෙන තුරු මීගමුව ප්‍රදේශයේ පිහිටි ළමා සුරැකුම් මධ්‍යස්ථානයට ඇතුළත් කරන ලෙසට අධිකරණයෙන් දිවුලපිටිය පොලීසියට නියම කර තිබේ.
දැරියගේ පියා මියගොස් ඇති බවත් සිව් දරු මවක වන සැකකාරිය පුද්ගලයන් නිවසට ගෙන්වාගෙන එක් පුද්ගලයකුගෙන් රුපියල් 2000 බැගින් මුදල් ලබාගෙන දියණියව නිවස තුළම ලිංගික අපයෝජනය සඳහා යොමු කර ඇති බවත් පොලිස් පරීක්ෂණ හරහා තහවුරු වී ඇත.
නිවසේ කිසිවකුත් නොමැති අවස්ථාවන්හි දී පුද්ගලයන්ව නිවසට ගෙන්වා ගන්නා සැකකාරිය, පැමිණෙන පුද්ගලයාව සහ දියණියව නිවස තුළට දමා, දොරවල් වසා, මුරකාවලේ යොදා ඇති බවට ද පොලිස් පරීක්ෂණ අනාවරණය කරගෙන තිබේ.
සැකකරුවන් 22 වනදාට අධිකරණය හමුවට ඉදිරිපත් කරන ලෙස අධිකරණය පොලීසියට නියෝග කර ඇත.