රජය විසින් ක්‍රියාත්මක කිරීමට බලාපොරොත්තු වන ජාතික සංහිඳියා වැඩපිළිවෙල පිළිබඳව පාර්ලිමේන්තුව නියෝජනය කරන සියලු පක්ෂ නායකයන් දැනුවත් කිරීම සඳහා කැඳවා තිබෙන සර්ව පාක්ෂික සමුළුව වර්ජනය කිරීමට සමගි ජනබලවේගය සහ ජාතික ජන බලවේගය පක්ෂ තීරණය කර ඇති බව දේශපාලන ආරංචි මාර්ග පවසයි.
අදාළ සර්ව පාක්ෂික සමුළුව (26) වැනිදා පස්වරු 5.30 ට ජනාධිපති කාර්යාලයේදී පැවැත්වීමට කටයුතු සංවිධානය කර තිබෙයි.
ඒ සඳහා සහභාගී වන ලෙස පාර්ලිමේන්තුව නියෝජනය කරන සියලු දේශපාලන පක්ෂ පමණක් නොව ස්වාධීන කණ්ඩායම් වල නායකයන්ට ද ජනාධිපති කාර්යාලය විසින් ආරාධනා කර තිබිණි.
ජනාධිපති රනිල් වික්‍රමසිංහ පසුගියදා උතුරු නැගෙනහිර ද්‍රවිඩ නායකයන් හමුවූ අවස්ථාවේ ප්‍රසිද්ධ ප්‍රකාශයක් කරමින් සඳහන් කළේ මෙරට ජාතික සංහිඳියා ප්‍රයත්නය ඊළඟ පරපුරට උරුම නොකර විසඳීම තම අරමුණ බවයි.
එසේම ජාතික සංහිඳියා වැඩපිළිවෙල දේශපාලනය වෙනුවෙන් යොදා ගැනීම තම ප්‍රතිපත්තිය නොවන බවද ජනාධිපතිවරයා අවධාරණය කළේය .
පාර්ලිමේන්තුව නියෝජනය කරන පක්ෂ නායකයන් එකඟතාව පළ කරන්නේ නම් 13 වන ආණ්ඩුක්‍රම ව්‍යවස්ථා සංශෝධනය මුළුමනින්ම වුවත් බලාත්මක කිරීමට තමන් සූදානම් බවද එහිදී ජනාධිපතිවරයා කීය.