කාර්ය මණ්ඩලයේ 39 දෙනෙකු සමග ඉන්දියන් සාගරයේදී අනතුරට ලක්වූ චීන ධීවර යාත්‍රාව මුදාගැනීමේ මෙහෙයුම් සම්බන්ධීකරණයට එක්වන්නැයි ශ්‍රී ලංකා නාවික හමුදාව වෙත ඉල්ලීමක් කර තිබේ.
ලූපෙන් යුවාන්යු 028 ලෙස නම් කෙරුණු අදාළ යාත්‍රාව (16) අලුයම් කාලයේදී අනතුරට ලක්වී තිබුණි.
චීන ජාතිකයින් 17ක්, ඉන්දුනිසියානු ජාතිකයින් 17ක් සහ පිලිපීන ජාතිකයින් 05 දෙනෙකු සමග ලූපෙන් යුවාන්යු 028 යාත්‍රාව අනතුරට ලක්වී ඇති බව වාර්තා වෙයි.
මෙම යාත්‍රාව මැයි මස 03 වනදා දකුණු අප්‍රිකාවේ කේප් ටවුන් සිට දකුණු කොරියාවේ බූසාන් දක්වා යාත්‍රකරමින් සිටින අතරතුර මෙලෙස අනතුරට ලක්වූ බව වාර්තා විය.
මෙම යාත්‍රාවේ සිටි නාවිකයින් මුදාගැනීමට සියලු ප්‍රයත්නයන් දරන ලෙස චීන ජනාධිපති ෂි ජින්පින් එරට බලධාරීන්ට දන්වා ඇති අතර ඉදිරියේ දුරස්ථ නාවික මෙහෙයුම්වල අවදානම අවම කිරීම සඳහා පියවර ගන්නා ලෙසද උපදෙස් ලබාදී තිබේ.
මේ සම්බන්ධයෙන් අප සිදුකළ විමසීමකදී නාවික හමුදා ප්‍රකාශක කපිතාන් ගයාන් වික්‍රමසූරිය මහතා සඳහන් කළේ නෞකාව අනතුරට ලක්වී ඇත්තේ ඔස්ට්‍රේලියාවට නිරිත දෙසින් වන ඔස්ට්‍රේලියානු සෝදිසි සහ මුදාගැනීමේ මුහුදු කලාපය තුළ බවය.
ශ්‍රී ලංකාවට ද මෙහි සෝදිසි සහ මුදාගැනිමේ මෙහෙයුම් සඳහා එක්වන ලෙස දන්වා ඇතත් මේ වනවිට එම කලාපය ආසන්නයේ නාවික හමුදා යාත්‍රා කිසිවක් නොමැති බව ඔහු වැඩිදුරටත් සඳහන් කරයි.
එමෙන්ම නාවික හමුදා යාත්‍රාවක් එම ප්‍රදේශයට යැවීමේ සැලසුමක් දැනට නොමැති බවද නාවික හමුදා ප්‍රකාශකවරයා වැඩිදුරටත් පැවසීය.