ඉදිරි සමගි ජන බලවේග ආණ්ඩුවක් යටතේ IMF ගිවිසුම සම්බන්ධයෙන් නැවත සාකච්ඡා කරන බව එම පක්ෂයේ නායක සජිත් ප්‍රේමදාස මහතා පවසයි.
ඔහු මේ බව සඳහන් කළේ ඊයේ (01) පැවති සමගි ජන බලවේගයේ මැයි රැලිය අමතමිනි.
“වැඩබිමෙන් ඇරඹෙන – මව්බිමේ අරගලය” යන නමින් සමගි ජන බලවේගයේ මැයි පෙළපාලිය මාලිගාවාත්ත පී.ඩී. සිරිසේන ක්‍රීඩාංගණය අසලින් ඊයේ දහවල් ආරම්භ කෙරුණි.
ඊට විපක්ෂ නායක සජිත් ප්‍රේමදාස මහතා එක්වුණේ එල්ෆින්ස්ටන් රඟහල අසලදීය.
අනතුරුව පෙළපාළිය ටෙක්නිකල් මංසන්ධිය හරහා කොළඹ ඒ.ඊ. ගුණසිංහ ක්‍රීඩාංගනය වෙත පැමිණ සමගි මැයි රැළිය පැවැත්විය.
රැලිය පැවැත්වෙන අතරතුර විපක්ෂ නායක සජිත් ප්‍රේමදාස මහතා ඊට එක්විය.
එහිදී අදහස් දැක්වූ විපක්ෂ නායක සජිත් ප්‍රේමදාස මහතා,
“දෙපිටකාට්ටු වැඩ කරන්න එපා. කකුල් දෙක දෙපැත්තෙන් තියන්න එපා. ඕනනම් ඉන්න නැත්තම් යන්න. මම මේ අනුමානෙට කියන්නේ. අපෙන් අහනවා ආණ්ඩුවට යනවාද කියලා. අපි ආණ්ඩුවකට යන්නේ සමගි ජනබලවේගයේ ජනාධිපතිවරයා එක්කයි. අපි ආණ්ඩුවක් යටතේ IMF එක පිළිබඳ නැවත සාකච්ඡා කරනවා. මේ රටේ ජනතාවගේ අයිතිවාසිකම් ආරක්ෂා කරන ප්‍රේමදාස යුගයේ නිර්මාණය වුණු ජනතාවාදී ප්‍රතිසංස්කරණයක් ඔස්සේ අලුත් IMF ගිවිසුමකට අපේ රජයක් යටතේ එළඹෙනවා.”