නිදහස් පක්ෂය යළි වෙනත් පක්ෂයක නායකත්වයක් යටතේ සන්ධානගත නොවන බව එම පක්ෂයේ සභාපති හිටපු ජනාධිපති මෛත්‍රිපාල සිරිසේන මහතා අවධාරණය කරයි.
මහනුවර මධ්‍යම වෙළෙඳපොළ ඉදිරිපිට පැවති එම පක්ෂයේ මැයි දින රැලිය අමතමින් ඔහු මේ බව සඳහන් කළේය.
ශ්‍රී ලංකා නිදහස් පක්ෂයේ මෙවර සිය මැයි දින සැමරුම වෙනුවෙන් බෝගම්බර බස් නැවතුම්පොළ, දෙයියන්නේවෙල එඩ්මන් සිල්වා ක්‍රීඩාංගණය සහ මහනුවර උසස් බාලිකා පාලස අසළින් මහජන පෙළපාළි 3ක් ආරම්භ කර තිබුණි.
අනතුරුව පෙළපාලි 3 දුම්රිය ස්ථානය අසළදී එකට එක්වී මහනුවර මධ්‍යම වෙළෙඳපොළ ඉදිරිපිට ළඟාවීමෙන් පසු රැලිය ආරම්භ කළේය.
එහිදී අදහස් දැක්වූ හිටපු ජනාධිපති මෛත්‍රිපාල සිරිසේන මහතා,
“මාව එල්ලුම් ගහට යවන්න මේ අයට වුවමනා වෙලා ශ්‍රී.ල.නි.ප ය ප්‍රතිපත්ති ගණනාවක් සකස් කළා. මම පැහැදිළිවම කියනවා ශ්‍රී.ල.නි.ප ය නැතිව කාටවත්ම ආණ්ඩු හදන්න බැහැ. රතු සහෝදරවරුන්ටත් කියන්නේ ඊළඟ ආණ්ඩුව හදන්න අපේ නායකත්වය ඕනේ. ඊළඟ මැතිවරණයෙන් කිසි ජගතෙකුට දිනන්න බැහැ. මීට පස්සේ අපි කිසි එකෙකුගේ පස්සේ යන්නේ නෑ. ඕන කෙනෙක් අපිත් එක්ක සන්ධානගත වෙන්න. අපි වගේ යෝධ පක්ෂයක් කවුරුත් නොදන්න පක්ෂයක ලකුණින් තරග කරන්න ගිවිසුම් හැදුණා. ඔබේ අපේ වාසනාවට ඡන්දය තිබ්බේ නැහැ. ඉදිරියේදී අපි තමයි නායකත්වය ගන්නේ.”