ත්‍රස්ත විරෝධී පනත් කෙටුම්පත සකස් කළේ ආණ්ඩු හෝ ජනාධිපතිවරයා ආරක්ෂා කිරීමට නොව ජීවිතාරක්ෂාව ඉල්ලා සිටින ජනතාව වෙනුවෙන් බව අධිකරණ අමාත්‍ය ආචාර්ය විජේදාස රාජපක්ෂ මහතා පවසයි.
ඔහු ඒ බව කියා සිටියේ රජයේ ප්‍රවෘත්ති දෙපාර්තමේන්තුවේදී ඊයේ (18) විශේෂ මාධ්‍ය හමුවක් පවත්වමිනි.
“ගොඩදෙනෙක් ඉන්නවා ත්‍රස්තවාදීන්ගේ අයිතීන් වෙනුවෙන් කතා කරන්න. හැබැයි ත්‍රස්තවාදයට විරුද්ධව අපේ ජීවිත රැකගන්න අවශ්‍යයි කියලා විශ්වාස කරන අසරණ ජනතාවගෙන් 90%කගේ අයිතිවාසිකම් වෙනුවෙන් ඒ අය කථා කරන්නේ නැහැ. සමහර වෙලාවට සමහර මාධ්‍යත් නිහඬ ප්‍රතිපත්තියක් අනුගමනය කරන්නේ. අපි නීති හදන්නනේ ආණ්ඩු රකින්නවත් අපිට රැකෙන්නවත් ජනාධිපති රකින්නවත් නෙමෙයි. මේ රටේ ජනතාවගේ ජීවිත ආරක්ෂා කරන්න.”
“ත්‍රස්තවාදී ක්‍රියාවක් වෙනුවෙන් මාධ්‍ය පෙනී ඉන්නවා නම්, මාධ්‍ය ප්‍රචාරණය දෙනවා නම් ඒක මේ පනත යටතට ඇතුළු වෙනවා. හැබැයි පනතෙම අපි අවස්ථා දීලා තියෙනවා.. ඇත්තටම ත්‍රස්තවාදී ක්‍රියාවක් තමයි.. ත්‍රස්තවාදයට පොළඹවන දෙයක් තමයි.. මාධ්‍යවේදීන් ප්‍රචාරය කරලා තියෙන්නේ… හැබැයි ඔහු එය ප්‍රචාරය කරන වෙලාවේ ඇත්තටම එය ත්‍රස්ත ක්‍රියාවක් බවට නොදැන තමයි කරලා තියෙන්නේ.. එහෙම අවස්ථාවක මාධ්‍යවේදියා පනතට යටත් නැහැ.”